Goddebivdinvuogit

Min máttut eai dálá olbmuid láhkai oastán bierggu njuolgga biergogávppis. Sii galge vuos bivdit fuođđu, mii ruohtadii luođuid meahcis. Gotti dahje eará sálašealli bivdin ii lean álkis bargu. Danin čuohtejagiid mielde leatge hutkojuvvon jos guđelágan goddebivdinvuogit.

Godderokkit

Áramus bivdovuogit leat várra leamaš bivdorokkit, mat roggojuvvojedje daškes sáttoeatnamii. Dávjá roggeseainnit vel duvdojuvvojedje muorrarusttegiiguin. Rokki ala ráhkaduvvui ovssiin ja bessiin lohkki, mii gokčojuvvui dasto sámmáliiguin ja jeahkáliiguin. Godderokki vuđđui sáhtte bidjat čohka geađggi dahje seaivasa. Ovdahistorjjálaš godderoggebázahusat vuhttojit ainge meahcis gobádahkan.

Govva: Tupu Vuorinen

Jyppyrä birrasiin lea gávdnon olles godderoggevuogádat, oktiibuot 107 godderoggebázahusa. Jurddašit ahte dán vuogádaga leat geavahan čakčadálvve álbmogasbivddus, mas ledje mielde ollu bivdit. Lihkostuvvan bivdobaji maŋŋá bivdit ožžo juoba duháhiid kiluid gottebierggu.

Vuopmanbivdu duoddariin

Vuopman lei sivllálágan áiderusttet. Jalges duoddariid ráhkaduvvojedje áidegeažit, mat ledje juoba 20 km:a duohken nubbi nuppis. Álggos áiddit ledje hárvvesláhkai ceggejuvvon seaivasat, maid gežiide ledje biddjojuvvon lavnnjit dahje bivttasrásot gottiid gavdnjet.

Go sivlááiddit lahkonišgohte nubbi nuppi, de seaivvasráidduid sadjái bohte muorraáiddit. Áiderusttega lođilágan geahči joatkašuvai gudjin, man geažis lei soames ceakko ráhppa. Loahpas bivdorusttega geažis lei stuorra áiddiin birastahtton roggi, soahtegárdi.

Vuopmanbivdu dáhpáhuvai giđđadálvve buriid čuoigansiivvuid áigge. Vuojeheaddjit ohce duoddariin goddeealu, vuojehedje dan seaivvasráidduid gaskii ja das ain soahtegárdái. Máidnasa mielde Eanodaga Bealdovuomis 1600-logus ássan Päiviö lei mielbivdiiguin goddán vuopmanbivddus oktii hávil juoba 1000 gotti.

Sáitesoappis goddebissui

Vuosttas dovdojuvvon giehtavearjjut ledje sáitesoappit ja giehtadávggit. Čuoigga johtti goddebivdis lei čuoigansoabbin sáitesoabbi ja giehtadávgi. Guktuin lei geavri, vai lei álkit čuoigat. Eanodatlaš sáitesoappi lohke leamaš sullii 140 cm:a guhku. Nubbin čuoigansoabbin doaibman giehtadávggi suotna geldojuvvui easkka bivdodilis.

Vuosttas albma goddebissut váldojuvvojedje atnui 1600-logus. Goddebissuin sáhtii báhčit dárkilit gitta 70 mehtera duohkai.