« Takaisin

Helssega giellabeasi mánát oahpásmuvve Gieddegeašgálgui

5/28/18

Mii lea Gieddegeašgálgu ja mat leat ustibat, naba mo Gieddegeašgálgu rávve mánáid? Dákkár lei Meahciráđđehusa ordnen Giellabeassi Máttabiekka mánáid sámegielat luonddubajásgeassima bargobáji juotna odne Helssega guovddášmeahcis.

Helssega giellabeasi mánát oahpásmuvve Gieddegeašgálgui. Govva: Pentti Pieski

Helssega giellabeasi mánát besse gullat Gieddegeašgálgu viissis rávvagiid ja oahpásmuvvat su skihpáriidda Guovddášmeahcis šerresčázát ádjaga guoras. Gieddegeašgálggu rávven lea eahpenjuolgga, sátnevádjasiid, máidnasiid ja árvalusaid bokte. Dan dihtii lea dehálaš guldalit dárkilit. Ovdamearkan Gieddegeašgálgu sáhttá jearrat, ahte mii lea allagat go várri muhto vuollegut go čáhppesmuorji.
 
Ádjaga luhtte lamadeigga maiddái čáhcerávga ja čahkalákkis, dasa lassin doppe ledje guolit, lottit, muorjjit, guobbarat ja dakkár rásit mat borret bierggu. Čáhcerávga oidno dušše dakkár čáziid guoras, gosa mánát eai oaččo mannat okto dahje lobi haga. Čahkalákkis fas lea gáldu háldi, guhte fákte gáldu ártna. Dat lea hui árgges diŋga ja gáldu ártnahan lea dat, ahte čáhci seailu buhtisin. Eará čáhceeallit fas ledje mánáide eanet oahppásat, dego dápmot, vuskkon, hávga ja njáhká. 
 
Gieddegeaži guolit Pasilas. Govva: Kirsi Ukkonen
 
Olbmoborranrássi ja "biergoborrišattut" geasuhedje mánáid ja sii smihtte, ahte leatgo Sámis duođaige dakkár šattut mat borret olbmuid? Duohtavuođas ája- dahje johka- ja jávregáttiid olbmoborranrássi, man namma lea maiddái boska dahje fádnu, lea sápmelaččaide dehálaš šaddu go dan leat geavahan dálkkodeapmái. Bargobájis šattut, mat borret bierggu, ledje čurolasta ja alitvuodjalasta, maidda divrrit darvánit ja šattut geavahit dan biebmun.
 
Bargobáji ádjaga guoras mánát besse maiddái oahpásmuvvat guovssahii ja rievssahii. Guovssaha gal Guovddášmeahcis sáhttá oaidnit, muhto rievssat ii doppe oidno, earret dát duhkorasrievssat. 
 
Gieddegeašgálgu ássá gieddegeažis bovnna alde ja eallán doppe juo min máddariid áigge. Son diehtá olu áššiid ja lea guhkes eallimis áigge oaidnán vaikko maid. Valjis viisodaga dihtii Gieddegeašgálgu láve rávvet mánáid dalle, go sii dárbbašit veahki. Gieddegeašgálggu rávven lea eahpenjuolgga, sátnevádjasiid, máidnasiid ja árvalusaid bokte. Dan dihtii lea dehálaš guldalit dárkilit. Ovdamearkan Gieddegeašgálgu sáhttá jearrat, ahte mii lea allagat go várri muhto vuollegut go čáhppesmuorji.
 
Meahciráđđehusa doaimma oktan ovddasvástádussan gullá luonddubajásgeassin ja sámegiela čalmmustahttin. Bargobádji lei dan beales maiddái earenoamáš, ahte giellabeasi davvisámegielat mánát besse gullat anárašgiela, go Kirsi Ukkonen Luondduguovddáš Siiddas hálai anárašgiela ja Meahciráđđehusa sámegielat dieđiheaddji Pentti Pieski davvisámegiela.
 
Bargobáji vuođđun lei Gieddegeažis mánáidčájáhus, mii lei Sámemusea ja luondduguovddáš Siiddas 7.4.2017- 8.4.2018.
 
Lassidieđut
  • Spesiálaplánejeaddji Kirsi Ukkonen, Meahciráđđehus, tel. 0400 479 986, šleađgapoasta: kirsi.ukkonen(at)metsa.fi
  • Sámegielat dieđiheaddji Pentti Pieski, Meahciráđđehus, tel. 040 7696 109, šleađgapoasta: pentti.pieski(at)metsa.fi