« Takaisin

Lappi álbmotmehciin ja luondduguovddážiin ođđa galledanolahusat

1/26/18

Lappi álbmotmehciid galledanmearri stuorui jagi 2017 1,29 miljovdnii. Stuorámus galledanmeari lassáneapmi lei Urho Kekkonen álbmotmeahcis, ja Bállás-Ylläsduoddara álbmotmeahcci lei ain bivnnuheamos buot Suoma álbmotmehciin. Maiddái luondduguovddážiin gallededje dávjá, ja eandalii Pyhä-Luosto luondduguovddáš Naava bivnnuhisvuohta stuorui hirbmat olu.

Urho Kekkonen álbmotmeahcci. Govva: Pasi Nivasalo

Lappi álbmotmehciin gallededje dán jagi 1,29 miljon geardde dahjege sullii 50 000 galledeami eanet go ovddit jagi. Urho Kekkonen álbmotmeahci galledanmearri manai vuosttas geardde badjel 300 000, ja oalle buresge. Álbmotmeahcis gallededje mannan jagi 335 ooo geardde. Dat lea riikamet álbmotmehciin nubbin bivnnuheamos. Bállás-Ylläsduoddara álbmotmeahcci bisui ain njunnošis, doppe gallededje 533 000 geardde, mii lea 14 000 galledeami eanet  go ovddit jagi. Maiddái Leammi ja Riisitunturi álbmotmehciid galledanmearit lassánedje vehá. Pyhä-Luosto ja Oulanka* álbmotmeahcit bissot ovddit jagi dásis, mii lea hui buorre. Mearrabađa álbmotmeahci galledanmearit geahppánedje muhtun veardde fuones geassedálkkiid geažil.

"Galledanmeriid lassáneapmái leat ráhkkanan, ja Lappis leat investeren ovdamearkan turismaguovddážiid lagašmáđijaide, maidda stuorámus oassi galledemiin čuohcá. Muhto áššehasmeriid, mat ain sturrot ja šaddet eanet riikkaidgaskasažžan, stivremii galgá vel bargat olu, vai luondduárvvut eai áitojuvvo, guovlluid geasuhanfápmu seailu ja vánddardeaddjiid bastit bálvalit nu bures go vejolaš", muitala álbmotmeahccehoavda Tarja Tuovinen Urho Kekkonen álbmotmeahci birra.

Luondduguovddážat hui ealaskasat - Naavas hui alla lassáneapmi

Lappi luondduguovddážiid mannan jahki lei hui ealaskas. Stuorámus lassáneapmi lei Pyhä-Luosto luondduguovddáš Naavas, mas dahke ođđa olahusa, 130 00 galledeami, mii lea 10 000 galledeami eanet go ovddit jagi. Davvi-Sámi luondduguovddáš ja sámemusea Siida maiddái dagai olahusa 122 300 galledemiinis. Maiddái Oarje-Lappi Ylläsduoddara luondduguovddáš Kellokas, Duottar-Sámi luondduguovddáš Heahtás ja Bállásduoddara luondduguovddážat ledje ovddit jagi ektui eanet ealaskasa.

Galledanmeriid lassáneapmi váikkuha positiivvalaččat báikkálašekonomiijai

Lappi álbmotmehciid galledeaddjiid ruhtageavaheami báikkálaš oppalašsisaboahto- ja barggolašvuođaváikkuhusat ledje 139 miljon euro ja 1 392 olmmošbargojagi. Oassái gussiide álbmotmeahcci lea deháleamos sivva galledit guovllus. Sin ruhtageavaheami váikkuhus báikkálašekonomiijai ja barggolašvuhtii lei 80 miljon euro ja 805 olmmošbargojagi. Unnimustá dan veardde Lappi álbmotmeahcit bukte positiivvalaš lasáhusa báikkálašekonomiijai, go dát galledeaddjit bohtet guvlui álbmotmeahci dihtii. Galledeaddjiid sisaboahtováikkuhus báikkálašekonomiijai lei stuorámus turismaguovlluin, gos galledeaddjiid orrun lea guhkit ja turismabálvalusaid  fálaldat stuorát, ja dalle ruhta geavahuvvo eanet.

Báikkálašekonomiija váikkuhusat, álbmotmehciid, stáhta vánddardanguovlluid ja luondduguovddážiid galledanmearit ja diehtu báikkálašekonomiija váikkuhusaid rehkenastinvuogis: