« Takaisin

Retkikarttai eanet gokčevaš diehtu skohterluottain ja -máđijain ovttasbarggus gielddaiguin ja servviiguin

10/2/17

Meahciráđđehusa Retkikartta.fi-bálvalusa buorránan kártadiehtu skohterluottain ja máđijain fállá skohtervuoddjiide vejolašvuođa plánet luonddureaissuideaset ain buorebut badjel gieldda- ja eanagotterájáid. Árabut Meahciráđđehus lea fállán Retkikarttai skohtervuoddjiide kártadieđu skohtervuodjinfálaldagas lagamustá guovlluin, gos leat olu stáhta eatnamat. Dál gielddat ja searvvit sáhttet skohterluottaideaset ja -máđijaideaset áibbas nuvttá Retkikartta.fi-bálvalussii Lipas-vuogádaga bokte.

Skohtervuodjin spiehkkasa máŋgga eará luonddus lihkadeamis nu, ahte mátkkit ollet dávjá viiddis guvlui badjel gielda- ja eanagotterájáid. Skohtervuoddjiide álkidahttá reaissu plánema, jus áiggi dási riikkaviidosaš kártadihtui leat laktojuvvon lassidieđut earálágan luottain ja máđijain. Dáidda hástalusaide leat vástidan dahkamiin buoret eavttuid kártadieđu almmustahttimii Retkikarttas ovttasbarggu bokte.

Gielddat, ovttastusat, šládjalihtut ja searvvit leat sáhttán luđet luonddulihkadanbáikkiideaset oidnot nuvttá riikkaviidosaš Retkikartta.fi-bálvalussas Lipas-vuogádaga bokte.  Dál ovttasbargu lea viidon gokčat maiddái gielddaid ja servviid skohterluottaid ja -máđijaid. Gielddat ja searvvit sáhttet laktit kártii oidnot luddii ja máđidjii guoskevaš lassidieđuid. Dieđut beaiváduvvojit Retkikarttai Lipas-vuogádagas oktii jándoris. Ná ovdamearkan gaskaboddasaš linnjennuppástusain sáhttá dieđihit álkit.

Retkikartta.fi-bálvalus fállá gielddaid ja servviid luonddulihkadanbáikkiide earenoamáš oidnoma kárttas. Skohtervuoddjit leat hárjánan geavahit álkes Retkikartta-bálvalusa, mas jo ovddežis, leat čájehan duháhiid kilomehteriid sturrosaš skohtervuodjinfierpmádaga.

Retkikartta-bálvalusa buvttada Meahciráđđehus, ja jagi 2016 bálvalusa geavahedje jo 3,6 miljon geardde. Lipas dahjege liikuntapaikat.fi-vuogádat lea nuvttá ja anus buot gielddain. Lipas-vuogádaga hálddaša Jyväskylä universiteahta lihkadandieđalaš dieđagoddi ja ruhtada oahpahus- ja kulturministeriija. Luonddulihkadanbáikkit, maiddái skohterluottat ja -máđijat, luđejuvvojit gielddain Lipas-vuogádahkii. Gielddat ja searvvit eai maiddái dárbbaš máksit Retkikartta-bálvalusas oidnomis maidige.

Lassedieđut