« Takaisin

Siiddas ávvujahki - Siida deavdá 20 jagi

1/16/18
Sámemusea ja Badje-Lappi luondduguovddáš Siida deavdá 20 jagi (1998‒2018). Siiddas leat máŋggat sivat ávvudit! Siidda doaimmat leat viidon ja šaddan máŋggabealagin, ja doppe leat fitnan guossit máŋgga geardde eanet go ledje vuordán. Maiddái bargit leat beali eanet álgojagiid ektui. Ávvujahki oidno Siidda doaimmain máŋgga láhkai. Siida ávvujagi ávvudoalut leat 27.3.2018 ja dalle dálus leat rabas uvssat.
 

Siidda historjá

 
Siidda historjá álgá olgomuseas. Go Anára sámemusea álggahii doaimmas 1960-logus, de dat lei dalle olgomusea. Jurdda museadálu huksemis, mii deavdá ođđaáigásaš museadoaimma gáibádusaid, riegádii 1980-logu álggus. Meahciráđđehus fas lei plánegoahtán luondduguovddáža Leammái.
 
Sámemuseabargojoavku vuođđuduvvui 1987 ja dat ráhkadii vuođđudanplána Sámemusea ja oahpistanguovddáža oktasaš huksenprošektii. Ieš dálu huksenplánat álggahuvvojedje 1992 ja vuođđočájáhusa álgogiehtačálus šattai gárvvisin seamma jagi.
 
Heajos áiggit 1990-logus guhce ieš huksenprošeavtta plánema, muhto čájáhusbargojoavku jotkkii aktiivvalaččat sisdoalu plánema. Plánenmuddu bisttii máŋggaid jagiid ja dan áigge čájáhusa giehtačállit ráhkadedje nana vuođu čájáhusaide, mat leat eallán áiggis. Siidda huksenprošeakta oaččui EU-ruhtadeami 1995, dállu šattai gárvvisin 1998 ja dás álggii Sámemusea ja Badje-Lappi luondduguovddáža oktasaš bálggis Siidan.
 

Ávvujagi prográmma

 
Ávvujahki oidno Siidda dáhpáhusain, Siida Shop -gávppis ja čájáhusain.
Ávvubeaivve 27.3.2018 rahppojit guokte čájáhusa. Siida 20 jagi -govvaráidu muitala Siidda máŋggabealat doaimmaid birra. Nubbi ávvučájáhus lea Sámemusea vuođđudeaddji Johan Nuorgam eallinbarggu birra. Nuorgam lei Samii Litto -searvvi njunuš. Čájáhusa váimmusin leat Nuorgam 1930-logus čoaggin hárvenaš diŋggat, mat leat seammás vuosttas oassi dávviriin, maid Álbmotmusea lea máhcahan Siidii.
 
Ávvujagi áigge Meahciráđđehusa luondduguovddáža luonddueahkediin háleštallet Leammi álbmotmeahci birra. Sámemusea kultureahkedat fas gieđahallat máŋggaid temáid musea temáid geahččanguovllus. Mánáide ordnejuvvojit máinnasbottut Gieddegeažis-čájáhusas.
 
Siiddas illudit ávvujagis, ja vuorddašit maid ruhtadanmearrádusa Siidda viiddideami várás. Go ruhtadeapmi lea sihkkar, de ođaduvvon Siiddas lea doarvái sadji dávvirčoakkáldagaide, restoráŋŋii ja áššehasbálvaleapmái. Maid vuođđočájáhus ođasmahtto.
 
Sámemusea ja Badje-Lappi luondduguovddáš Siida ja Restoráŋŋa Sarrit giitet buot ovttasbargoguimmiid ja ustibiid oktasaš jagiin.
 
Bures boahtin Siidii ávvudit 20 jagi ávvujagi minguin ovttas!