Asset Publisher

Back

Urho Kekkonen álbmotmeahcci viidu

11/23/18
Dásseválddi presideanta lea 9.11.2018 nannen lága Urho Kekkonen álbmotmeahci rájáid nuppástuhttimis. Lága, mii boahtá fápmui juovlamánu 3. beaivve, mielde álbmotmeahccái laktojuvvo lagabui 200 hektára suodjaleami várás skáhppojuvvon árvvolaš luondduguovllut ja earuhuvvo vuollel 10 hektára guovlu Dávgevári luondduguovddáža birrasis. Ráddjennuppástus dahká vejolažžan luondduguovddáža máŋggabealagabbo ávkkástallama ja ovddideami go ovdal. 
 
Álbmotmeahci máttaravddas ráddjejuvvo álbmotmeahci olggobeallái 9,3 hektára viidosaš, E75-geidnui rádjašuvvan Dávgevári luondduguovddáža guovllu. Seammás álbmotmeahccái laktojuvvo álbmotmeahci davvenuortaravddas Šuomajoga guoras 198 hektára sturrosaš guovllu.
 
Govva: Pasi Nivasalo/MH.
 
Ráddjennuppástus dahká vejolažžan Dávgevári luondduguovddáža ja dan giddodaga máŋggabealagabbo ávkkástallama ja ovddideami go ovdal. Dávgevári luondduguovddážii, mii lea sulaid 30 km geažes Suoločielggis, dahke mannan jagi sulaid 8 800 galledeami, mii lea vuollel 3 % álbmotmeahci galledeaddjimearis. Luondduguovddáža čájáhus lea oassái boarásmuvvan. Luondduguovddáža guovlu báhcá ain stáhta oamastussii ja oassin Natura 2000 -fierpmádaga. Meahciráđđehus fuolaha boahttevuođasge guovllu luonddu- ja soahtehistorjjálaš árvvuin. 
 
Urho Kekkonen álbmotmeahccái laktima vuollásaš ng. Šuoma Ville guovlu rádjašuvvá álbmotmeahccái ja gullá dainna seammá Natura-guvlui. Eatnamat leat skáhppojuvvon stáhtii jo áigá luonddusuodjaleami várás ja leat Meahciráđđehusa Luonddubálvalusaid hálddašeami vuolde. Šuoma Ville báiki lea eanadaga ja kulturárbbi dáfus árvvolaš ja luonddutiippaid beales máŋggabealat buolžaguovlu Šuomajoga guora. Dat dievasmahttá mearkkašahtti láhkái álbmotmeahci luondduárvvuid.
 
Urho Kekkonen álbmotmeahcci lei mannan jagi galledeaddjimeari beales Suoma nubbin bivnnuheamos álbmotmeahcci (334 700 galledeami jagi 2017) Bállás- Ylläsduoddara maŋŋá. Eanaš oassi Urho Kekkonen álbmotmeahci gálledeaddjirávnnjiin boahtá Suoločielggi bokte.
 
Dál dohkkehuvvon láhkii eai evttohan nuppástusaid riikkabeaigieđahallama áigge.
 
Lassidieđut: