Ååʹn luâđastvuejjamlååʹv riikk määddaid ooccâmnalla liâđǥlânji

Luâđastvuejjamlååʹv riikk määddaid lie ååʹn aʹlǩǩânji ooccâmnalla Eräluvat.fi-neʹttkaaupâst mieʹldd looǥǥǩâni kooum Lappi tââʹvmõs  kååʹdd. Ođđ lååʹppooccmõš kuâskk jååttmõõžž nuʹtt vuejjamkuuʹrčin ǥu vuejjamkuuʹrči åålǥbeäʹlnn nuʹtt muõtti äiʹǧǧen ǥu muõttǥateʹmes äiʹǧǧen. Looʹvid vuäitt õinn vuäʹstted nuʹtt Meäʹcchalltõõzz kääzzkâʹsttempaaiʹǩin ǥu kääzzkâʹsttemnââmrest.

 
Vuejjamlååʹv riikk määddaid lie määuslaž, veerǥlaž ǩeäinain vuäǯǯ vuejjad määustaa


Meäʹcchalltõõzz moottorǩeâlkk-kuuʹrč lie määuslaž, pannveerǥlaž ǩeäin, koid lääʹjj mieʹldd meäʹrtõõlât jânnmen. Ǩeâlkain jooʹtti vuäitt haʹŋǩǩeed täin vuejjma jiõccses leʹbe piârrǥa õhttsaž määuslaž vuejjamlååʹv. Lååʹv hâʹdd vaajtââll ååuʹcest viiđlo eeuʹr kõõskâst tõn mieʹldd, mõõn kuʹǩes ääiǥas lååʹv ooccât. Tåʹlǩ dommkådda occum lååʹpp lij määustem.

Veerǥlaž moottorǩeâlkk-ǩeäin eʹpet lie moottorǩeâlkain jååʹttma jurddum, čuâǥǥastrafikklääʹjjest meäʹrtõllum čuõkku. Veerǥlaž ǩeäinai âânnmõš lij määuʹstem, åårǩani ǩidd tõʹst ǩeän vuäʹmstem määddain ǩeäinn jåått. Ǩeäinai tuõʹllʼjummuš kooll kooʹddid leʹbe moottorǩeâlkkpoolid. Ǩeäinai åålǥbeäʹlnn moottorǩeâlkain jååttmõš õõlǥat pâi mäddvuäʹmsteei leʹbe moottorǩeâlkk-kuuʹrč tuõʹllʼjeei lååʹv, lokku vääʹldǩani jiõŋŋâm čääʹccvuuʹd, koʹst vuäǯǯ ǩeâlkain vuejjad täättas mieʹldd.  Riikk määddain lååʹv meâtt Meäʹcchalltõs.

Jeeʹres luâđastvuejjamlååʹv riikk määddaid

Vuejjamkuuʹrči čåårbeäʹlnn vuejjmõš muõtti äiʹǧǧen di puk muõttǥateʹmes ääiʹj luâđastvuejjmõš riikk määddain lij lääʹjjest vueʹjj mieʹldd ǩiõlddum. Meäʹcchalltõõzzâst vuäitt kuuitâǥ ooccâd jeeʹrab luâđastvuejjamlååʹv jõs taʹrbbe lij vuâđđ.

Mäinnan luâđastvuejjamlååʹppooccmõʹšše lij ouddmiârkkân tarbb jååʹtted ǩidlma lossõõzzâst moksteeʹl šiil- leʹbe kueʹllhåiddma kuulli tuâjai diõtt, tuʹtǩǩeemtuâjj leʹbe šõddmõõžž jäʹrjstem diõtt. Tõin peʹrrjum mähss lij ǩidd tõʹst, ooʒʒât-a lååʹv dommkådda leʹbe mõõn tärkka Meäʹcchalltõs joudd čiõlǥted leʹbe vuäjjned ooccmõʹšše vuõiggâdvuõđlaž beäʹlnn.

Näkam luâđastvuejjamlooʹvid ǩiõttʼtõõlât mââimõõzzâst 15 arggpeeiʹv seʹst lååʹppooccmõõžž kueʹđđmest.

Čoʹrstõkkân liâđǥlaž vuejjamlååʹppooccma lie veâl Jeänõõǥǥ, Aanar da Uccjooǥǥ kåʹddniiʹǩǩi dommkåddses ooccâm muõtti ääiʹj luâđastvuejjamlååʹv. Tõid ooccât õinn Meäʹcchalltõõzz pääiklaž äʹššniiʹǩǩi kääzzkâʹsttempääiʹǩest. Eeʹjjest 2020 ääʹljeeʹl tõid še vuäitt ooccâd liâđǥlânji.

Lââʹssteâđ