Vánddardanjohtolagat ja bálgát

Johtolagaid vuolginsajit

  • Pyhä-Nattanena bálgá ala beassá Soabbatjávrri geainnus luonddumeahci oarjeráji alde dahje sullii 1 km duohken rájis luonddumeahci siskkobealde
  • Finnmárkkubálggis vuolgá Soabbatjávrri meahccebiilageainnu guoras, sullii 16 km duohken váldogeainnus nr 4
  • Nuorttabeale luondduguovddážis Tankavaaras beassá maiddái Pyhä-Nattanenii manni bálgái
  • Pyhä-Nattanena bálgái beassá váldogeaidnu nr 4:s Männistö buohta Tankavaara davábealde. Álgomátkkis sullii 5 km ossodagas johtolat ii leat merkejuvvon meahccái, muhto dat manná boares duiskalašgeainnu mielde ja geaidnu lea merkejuvvon vánddardankárttaide.
  • Finnmárkkubálgái beassá maiddái Kiilopää geainnus dahje Laanilas

Merkejuvvon johtolagat

  • Pyhä-Nattanena bálggis, 7 km, manná luonddumeahci oarjjageahčen. Johtolahkii beassá Soabbatjávrri meahccebiilageainnus luonddumeahci ráji alde dahje sullii 1 km duohken luonddumeahci rájis. Go johtá johtolaga riekkesjohtolahkan, de dan guhkkodahkan šaddá oktiibuot 7 km. Bálggis finada Pyhä-Nattanena alážis ja manná oasi mátkkis Nalijogaráigge. Johtolaga mielde lea ceakkus Pyhä-Nattanena alážii ja doppe bodnái, ja nuba johtolat ii heive dakkáriidda, geat leat heajos vuimmiid alde. Johtolat lea merkejuvvon meahccái ruoná čuolddaiguin.
  • Soabbatjávrri geaidnu / Nalijohka - Tankavaara (17-20 km). Pyhä-Nattanena bálggis vuolgá Soabbatjávrri geainnus ja dakko beassá maiddái Tankavaara ja Koilliskaira luondduguovddážii. Nalijoga lávu luhtte johtolat suorrana, goas galgá válljet dan johtolaga, mii joatkašuvvá Soabbada luonddumeahci oarjjegeaže davás. UK-álbmotmeahci bealde johtolat ovttastuvvá Tankavaara luonddubálgáide. Loahppamátkki sáhttá johtit Kuukkelilenkki mielde dahje geologalaš luonddubálgá mielde gitta Koilliskaira luondduguovddážii. Johtolat ja luonddubálgát leat merkejuvvon ruoná čuolddaiguin. Jos háliida guhkit johtolaga, de sáhttá joatkit mátkki gitta váldogeainnu nr 4:ii Männistö rádjai. Loahppamátkkis sullii 5 km mátkkis johtolat ii leat merkejuvvon meahccái, muhto dat manná boares duiskalašgeainnu mielde ja geaidnu lea merkejuvvon vánddardankárttaide.
    • Bálvalusat: Pyhä-Nattanena buollingozihanstohpu (beaivestohpu), Nalijoga lávvu, Riestonaapa dolastallanbáiki.
    • Oaidnámušat: oainnus Pyhä-Nattanena alážis geahčadettiin, luonddumeahci eakti álgoluondu
  • Finnmárkkubálggis, 35 km, lea oassi Luirujoga, Soabbatjávrri ja Avviljoga bokte manni dološ johtolagas Finnmárkui Norgga riddui. Johtolat manná Soabbada luonddumeahci čađa lulil davás ja joatkašuvvá UK-álbmotmeahci bealde. Loga lasi Finnmárkkubálggis.

Doala beatnaga gitta. Govva: Seppo Leinonen

Luonddusuodjalanguovlluin biebmoeallit eai oaččo leat veaiddalasas.