Stohpotiippat

Ávdinstobut (ÁS)

Ávdinstohpu lea ovttageardánis visti, mii lea dárkkuhuvvon meahcis iežas vuimmiiguin dehege lihkadeaddjiide, geat vázzet, čuiget, mellot dehe suhket. Stobut leat rabas, lássekeahtes idjadan- ja vuoiŋŋastanbáikkit. Stobuin sáhttá idjadit ija dehe guokte almmá ovddalgihtii várrema haga. Váldde vuhtii, ahte bahkkedanáiggiid stobuide ii álohii čága.

Ávdinstobuin leat seaŋgabeaŋkkat, beavdi, beaŋkkat, vuoššanlihtit, kamiidna ja hivsset sihke muhtimin gássaommán. Dasa lassin leat boaldenmuorat sihke sahá ja ákšu.

Stobuin ii oaččo borgguhit. Muhtin stobuide ii oaččo buktit biebmoelliid. Dárkkis ášši dárkiles stohpogovvádusas.

Beaivestobut (BS)

Beaivestohpu lea ávdinstohpu, mii lea dárkkuhuvvon beaivereaissuid vuoiŋŋastanbáikin meaddeljohtti vánddardeaddjái. Stobut leat turismaguovddážiid lahkosiin. Heahtedilis beaivestobuinge sáhttá idjadit, muhto dain vánddardeaddji šaddá oađđit láhtti nalde, daningo seaŋgabeaŋkkat eai leat dain dábálaččat.

Beaivestobuin lea kamiidna, dávjá maid gássaommán, vuoššanlihtit, beavdi ja beaŋkkat sihke hivsset. Dasa lassin lea boaldenmuorat sihke sahá ja ákšu.

Stobuin ii oaččo borgguhit. Muhtin stobuide ii oaččo buktit biebmoelliid. Dárkkis ášši dárkiles stohpogovvádusas.

Gámmet (Gá)

Gámme lea unna, darfegáhttot visttáš, mii lea muhtin oassái eatnama siste. Oassi gámmiin lea dárkkuhuvvon dušše beaiveatnui ja oasis sáhttá idjadit almmá várrema haga ija dehe guokte.

Gámmes leat unnán dávvirat. Idjadeami várás muhtin gámmiin sáhttet leat seaŋgabeaŋkkat, muhtimin dušše guolbi. Gámmiin lea árran dehe kamiidna ja dábálaččat hivsset, jos ovttaskas gámme ovdanbuktojumis ii nuppe ládje daddjo.

Hirsagoađit (HG)

Hirsagoahti lea dárkkuhuvvon dábálaččat beaivveáigge vuoiŋŋastanbáikin buot vánddardeaddjiide. Hirsagoađit leat dábálaččat johtolagaid dehe mohtorgielkámáđijaid guoras. Heahtedilis dainnai sáhttá idjadit, muhto vánddardeaddji šaddá oađđit láhtis, daningo seaŋgabeaŋggat eai leat dain dábálaččat.

Goađis lea árran guovdu ja dan birra beaŋkkat. Goađis lea dábálaččat guolbi, muhto muhtin gođiin lea fielloláhtti. Dasa lassin lea boaldenmuorra sihke sahá ja ákšu.

Várrenstobut (VS)

Várrenstohpu, mii lea lássejuvvon ja mas šaddá máksit, lea iežas vuimmiiguin lihkadeaddji vánddardeaddji suodje- ja idjadanbáiki. Stohpui besset idjadit dušše dat, geain lea dohko várrejuvvon oađđinsadji ovtta dehe guovtti idjii. Oađđinsaji várren olmmoš oažžu stohpočoavdaga mávssu vuostá. Várrenstohpu sáhttá leat maid ávdinstohpovistti oassi dehe muđuid dan olis. Dain idjadit ovttas nu oahpes go amasge vánddardeaddjit.

Várrenstobuin leat seaŋgabeaŋkkat, beavdi, beaŋkkat, vuoššanlihtit, kamiidna ja muhtimin gássaommán ja hivsset. Vánddardeaddji anus lea boaldenmuorra sihke sahá ja ákšu. Dasa lassin várrenstobuin leat dábálaččat guottat, gokčasat ja bolstarat.

Stobuin ii oaččo borgguhit iige dohko oaččo buktit biebmoelliid.

Várrengámmet (Vgá)

Várrengámme lea gámme, mii láigohuvvo háválassii obanaga dihto idjii dehe guktii. Várrengámmet leat dušše Urho Kekkonen -álbmotmeahcis. Gámmes sáhtát idjadit iežat joavkkuin. Stuora gámmii čáhket eanemusat 6 olbmo ja unnái 3 olbmo.

Várrengámmiin leat seaŋgabeaŋkkat, beavdi, beaŋkkat, vuoššanlihtit, gássaommán, kamiidna ja hivsset. Vánddardeaddji anus lea boaldenmuorra sihke sahá ja ákšu. Dasa lassin várrengámmiin leat guottát, gokčasat ja bolstarat.

Várrengámmiin ii oaččo borgguhit iige dohko oaččo buktit biebmoelliid.

Láigostobut (LáS)

Láigostohpu, mii lea lássejuvvon ja mas galgá máksit, lea vánddardeaddji suodje- ja idjadanbáiki luonddusuodjalanguovlluin dehe meahcceguovlluin. Stohpu láigohuvvo háválassii obanaga dihto idjii dehe muhtimii. Muhtimat láigostobut leat heivvolaš dakkár vánddardeddjiide, geat háliidit idjadit iežas joavkkuin dehe orrut vaikkobe vahku seamma báikkis.

Láigostobuid ovttageardánis biergasiidda gullet seaŋgabeaŋkkat, beavdi, beaŋkkat, vuoššanlihtit, kamiidna, sahá ja ákšu, dávjá gássaommán ja hivsset. Vánddardeaddji anus leat boaldenmuorat sihke sahá ja ákšu. Dasa lassin láigostobuin sáhttet leat guottát, gokčasat ja bolstarat.

Láigostobuin ii oaččo borgguhit iige dohko oaččo buktit biebmoelliid.

Dorvvolašvuohta


Stobus lea buollinváruheaddjit, muhto váldde fárrui sihkkarvuođa dihte buollinváruheaddji báhttera V9 ja/dahje oapmi mátkibuollinváruheaddji.

Suoma stobut - Geavaheapmi ja dorvvolašvuođarávvagat - Video

Guidelines and safety in Huts. Photo: Jari Hindström

Video on YouTube