Luonddueatnandieđalaččat Suoločielgi lea Perä-Pohjolas ja Vuovde-Lappis. Suoločielggi alimus duottarčohkat leat Kiilopää (546 m), Kaunispää (437 m) ja Iisakkipää (454 m). Guovllu čađa manná guossavuovddi davvirádji, mii oaivvilda dan, ahte guovllu davábealde guossavuvddiid sadjái bohtet beahcevuovddit.

Oainnus Kaunispääs. Govva: Martti Rikkonen


Suoločielggi duottaralážiid alde lea várddus nuorttas ja lulás UK-álbmotmeahci duottarguvlui ja Soabbada luonddumeahci Náttašduoddariidda. Oarjindavvin oidno áibmadas Bátnejohskáidi, man čađa mohkohallá meahccás Avviljohka.

Mii lea dat vilges rásiid, mii šaddá juohke sajis?

Vilgeslieđat beatnatjoŋat šaddet geasseguovdil bálgáid guoras. Vilges lieđit liđđosiin eai leat goittot lieđđelasttat nugo gáttášii, muhto suodjelasttat. Go dutká liđđosa dárkileappot, de fuobmá ahte ieš lieđus suodjelasttaid gaskkas lea uhcci ja čáhppat. Čavččabeallai beatnatjoŋa lasttat ruvssodit ja dalle dan sáhttáge hervvošit ivdnás ruškerássin. Beatnatjoŋa muorjjit leat ruoksadat ja giktaleaddjit oaidnit. Dat leat álmmeheamet ja jáffuláganat, ja nuba daid borret lottit, muhto eai olbmot. Muorjjit eai leat mirkkolaččat.

Beatnatjokŋa. Govva: Nina Raasakka

Ruški?

Ruški lea juohke jage seamma govdodatgierddu alde sullii seamma áigge. Ruški álgigoahtá, go čuovgamearri geahppána ja lea čielga earru ija ja beaivvi gaskkas. Eanaruški álgá vehá ovdalaš go muorraruški. Suoločielggi guovllus alimuš ruški lea čakčamánu guovtte vuosttas vahku áigge.

Leago boahtte gease ollu čuoika?

Čuoikkaid mearri sáhttá molsašuddat mealgat jahkásaččat. Jos luonddus lea ollu muohta ja lávttas, de šaddá várra čuoikageassi, dasgo čuoikkaid goađit ahtanuššet čázis. Jos fas lea goike geassi, de čuoikkat sáhttet leat hui uhccán. Goittotge johka- ja ájaguorain lea álo čuoika, ja goalkin juoba giksin. Duottarvilttiin ja jalges sajiin čuoikkat eai báljo givssit olbmo. Go áigu geassit idjadit meahcis, omd. ávdinstobuin, de gánnáha váldit fárrui rággasa, man sáhttá lebbet oađđinsaji badjelii. Dalle bálle oađđit ihkku.

Loga lasi Suoločielggi lahkosiid luonddus