Juohkeolmmoš-vánddardeddjiid idjadanbáikin leat stobut ja barttat sihke nuvttá ja mávssu vuostá.
Nuvttá, rabas stobuin dábálaččamusat ja beakkánepmosat leat ávdinstobut. Stobut leat dábálaččat luottahis mátkkiid duohken riikamet davvi- ja nuortaosiin. Eará rabas stobut leat beaiveatnui dárkkuhuvvon beaivestobut. Maiddái rabas gámmet ja hirsagoađit leat heivvolaš vuoiŋŋastanbáikkit beaivet, muhto dat sáhttet spiehkastatdáhpáhusain addit maid idjasuoji.
Go geavaha lássejuvvon stobuid dehe barttaid, maid galgá várret ja main lea máksu, dáhkida alccesis sihkkaris idjasaji. Stobut, main šaddá máksit, leat oanehisáigásaš atnui dárkkuhuvvon várrehusstobut ja várrehusgámmet, láigostobut sihke guhkitáigásaš atnui dárkkuhuvvon láigobarttat.
Luondduturistafitnodagat sáhttet geavahit stobuid ja eará rusttegiid, dego dolastallanbáikkiid, iežaset áššehasaid orustansadjin, muhto dasa galgá leat Meahciráđđehusa lohpi. Gánnáha goittot váldit vuhtii ahte ávdinstobuid ii oaččo geavahit idjadeapmái luondduturismma fitnodatdoaimma oktavuođas, muhto áššehasaid idjadeapmái gánnáha geavahit várren- ja láigostobuid dahje priváhta idjadanbálvalusaid. Maiddái iešráđálaččat johtti stuorra joavkkuid ávžžuhit geavahit idjadeapmái juogo iežaset tealttáid dahje várrenstobuid.