Áittavullosaš njálla fikkai besset Eanodaga duottarguovllus

Áittavuloš njálla lea Meahciráđđehusa Luonddubálvalusaid vástošládja. Meahciráđđehusa ja WWF:a ovttas skuvlejuvvon eaktodáhtolaš dárkkisteaddjit dárkkistit jahkásaččat njálabiejuid šlája dili čielggadeami várás. Dán jagi áice bessengeahččaleami, muhto dat dađi bahábut eahpelihkostuvai. Meahciráđđehus ja WWF dahket ovttasbarggu njála gádjumin maiddái doaimmahemiin borranautomáhtaid šlája eallinguovlluide.



Mannan gease Meahciráđđehusa Luonddubálvalusaid ealliáššedovdit áice, ahte muhtun Eanodaga duottarguovllus lihkadedje guokte njála. Dán njállabára maiddái gávnnahedje ássat muhtun biejus. Njálat ledje earret eará roggan bieju. Dađi bahábut suoidnemánus dahkkon beassedárkkistusas bessengeahččaleapmi gávnnahuvvui leat eahpelihkostuvvan.
Eahpelihkostuvvama sivvan sáhtii lean muolddahiid ja eandalii goddesáhpániid meari gahččan bessema álgomuttus. Duottarguovllus goddesáhpániin lea stuorra mearkkašupmi njálaid bessema lihkostuvvamiidda. Fuones goddesáhpánjagi njálla ii dábálaččat besse olláge.
Njála lihkostuvvan bessemiid eai leat áican Suomas badjel guovtti logijahkái,vaikke njálat lihkaditge Lappi duoddariin muhtun veardde jahkásaččat.

Ránnjáriikkain njálas manná buorebut

Ruoŧas ja Norggas leat gávnnahan dán jagi oktiibuot ainjuo 73 njállabeassádaga. Suoma lagamus bessemat ledje Norrbottena leanas Ruoŧas ja Várjjagis Norggas.
Njála dili buorideapmin lea jođus golmmajagi InterregNord ruhtadan fidnu. Fidnoguovlu sisttisdoallá Suomas Eanodaga ja Ohcejoga duottarguovlluid sihke Ruoŧa ja Norgga davimus osiid. Fidnu mihttomearri lea buoridit njála suodjalandili, ja vuohkin leat earret eará ovttasbarggu divttisteapmi eará riikkaid gaskkas, njála lassebiebman, riebanbivdu ja dieđiheapmi. Suomas biebmanautomáhtat leat dál buohkanassii 17, ja daid lea mihttomearri lasihit muhtun veardde. Njála gilvaleaddji, riebana, bivde mannan dálvve potentiála bessenguovlluin measta 400. Rieban lea maŋimuš jagiid leavvan ain davvelii njála eallinguovlluide.  

Suomas Meahciráđđehusa Luonddubálvalusat dikšu njála čuovvuma ja geavatlaš suodjalandoaimmaid. Dán jagi WWF vuođđudii ođđasit njállabargojoavkku, mas leat Meahciráđđehusa Luonddubálvalusaid ja WWF:a lassin mielde maiddái šlája čuovvuma ja suodjalandoaimmaid dahkan eaktodáhtolaččat. WWF oassálastá njála lassebiebmamii skáhppomiin automáhtain geavahuvvon beatnatbiepmu sihke fuođđokámeraid sihke rekrytere ja skuvle eaktodáhtolaččaid gieddebargguide.
 
Lassidieđut