Ođđasat

Gosa Bállás-Ylläsduoddara álbmotmeahcis dahket vánddardanjohtolagaid boahttevuođas, mat guovllut suodjaluvvojit dárkilit – oassálastte jearahallamii ja váikkut

Meahciráđđehusa Luonddubálvalusat čoaggá báráige vánddardeaddjiin ja guovllu ássiin oaiviliid, mo Bállás-Ylläsduoddara álbmotmeahci galggašii ovddidit čuovvovaš 15 jagi áigge. Luonddubálvalusat sávvá oaiviliid ovdamearkan das, maid johtolagain leat olu johttit dahje váralaš báikkit, leatgo joavdelas johtolagat dahje bosihanbáikkit ja johtolagaid oktasašávkkástallan lea doaibman.

Čuoigi ja dálvesihkkelasti.
 

Gii beare sáhttá muitalit oaivilis jearahallamii oassálastima bokte (new.maptionnaire.com, suomagillii).  

Luonddubálvalusat čoaggá oaiviliid dál, go Bállás-Ylläsduoddara dikšun- ja geavahanplána lea barggu vuolde. Dikšun- ja geavahanplána mihttomearri lea heivehit oktii luonddusuodjaleami, áhpásmuhttinanu ja eará geavaheami Suoma bivnnuheamos álbmotmeahci, Bállás-Ylläsduoddara guovllus.

– Mo divrras álbmotmeahccámet geavahuvvo? Jearahallama vehkiin álbmotmeahci geavaheaddjit sáhttet buktit ovdan sin sávaldagaid ja fuolaid. Vástádusaid ávkkástallat álbmotmeahci dikšuma ja geavaheami boahttevaš jagiin. Jearahallamis lean kártii sáhttá buktit ovdan sávaldagaid ođđa johtolagain dahjá ráhkadusain, sierraplánejeaddji Maarit Kyöstilä Meahciráđđehusa Luonddubálvalusain dadjá.

Jearahallamiin čoaggit dieđu maiddái álbmotmeahcis dáhpáhuvvan guollebivddus: gos leat bivnnuheamos guolástanbáikkit ja man bivnnuhis guollebivdu lea Bállás-Ylläsduoddaris.

Ruhta váikkuha, makkár áigetávvaliin ja man olu johtolagaid sáhttá ráhkadit ja burgit geavatkeahtes johtolagaid

Álbmotmeahcit leat luonddusuodjalanguovllut, maid dikšumis ja geavaheamis vástida Meahciráđđehusa Luonddubálvalusat birasministeriija stivrema vuolde. Okta álbmotmeahci dikšun- ja geavahanplána guovddáš mihttomearri lea stivret vánddardeami nu, ahte luondu ii das gillá.

Suodjaleami ja áhpásmuhttinanu oktiiheiveheami hástalusat leat ee. dovddus eanadatčuozáhagat, dego Ylläsa Kellostapuli ja Bállása Keimiöduottar. Kellostapulii ii mana virggálaš johtolat, muhto dan aláš lea gollagoahtán stuorra galledeaddjimeari dihtii. Keimiöduoddarii ii fas dál beasa virggálaš bálgá mielde, go boares johtinjohtolaga divvun ceakko duottarvielttis lea hui váttis.

– Boahttevaš dikšun- ja geavahanplánas mii galgat linnjet, dahkatgo dáin johtolagain virggálaččaid vai eastitgo oalát johtima čohka ala. Dáiddage áššiide sáhttá dál váikkuhit, Kyöstilä muitala.

Ođđa johtolagaid ráhkadeapmái váikkuhit sávaldagaid lassin álo maiddái goasttádusat ja Luonddubálvalusaid doaibmasis ožžon ruhtadeapmi.

Lassedieđut