Divresesoŋŋa álgá. Meahciráđđehus muittuha, ahte lievllisteaddji divremirkkuid (mirkoguottáid válmmaštannamat Ryobi ja Thermacell ) ávkkástallan lea measta oalát gildojuvvon álbmotmehciin ja eará stáhta suodjalanguovlluin. Daid ii oaččo ávkkástallat bálgáin ja eará máđijain jođedettiin, vuoiŋŋastan- ja dolastallansajiin iige govddiin.
- Lea váidalahtti, ahte álbmotmehciin johtet vánddardeaddjit, geain leat lievllisteaddji divremirkkot mielde. Álbmotmeahcit leat luonddusuodjalanguovllut, maid doaibman lea dorvvastit luonddu máŋggahámatvuođa. Lievllisteaddji divremirkkuin fas leat ávdnasat, mat leat klassifiserejuvvon hui mirkkolažžan čázádagaide. Sávvat duođaid, ahte olbmot čuvvot divremirkkuid geavahanrávvagiid, Arto Vilén Meahciráđđehusa Luonddubálvalusain dadjá.
Tukes rávvagiid mielde lievllisteaddji divremirkkuid oažžu geavahit dušše ráhkadusaid njuolggo lahkasis šilljobires, dego veránddain ja terássain. Vuoiŋŋastansajit ja goavddit leat rusttegat eaige ráhkadusat, ja dan dihtii geavaheapmi daid lahka lea gildojuvvon.
Ávdin- ja várrenstobut dahje eará suodjalanguovlluin lean ráhkadusat gullet prinsihpas lobálaš geavaheami guovlluide. Meahciráđđehus goittotge sávvá, ahte mirkkuid eai geavat daid šilljobiriin. Dát ráhkadusat leat guovdu suodjaluvvon luonddu ja dávjá lahka čázádagaid. Lievllisteaddji divremirkkuid ávdnasat leat váralaččat eandalii čáhceealániidda ja gavjendivrriide.
Lievllisteaddji divremirkkuid ávkkástallama gánneha garvit suodjalanguovlluid ráhkadusaid šilljobiriin maiddái eará vánddardeaddjiid dihtii.
Dušše Tukes dohkkehan rusttegiid geavaheapmi lea lobálaš. Lobálaš rusttegiid ja ávdnasiid dovdá Tukes lohpenummiris. Geavahanrávvagiid galgá álo čuovvut.
Geavatkeahtes divremirkkuid galgá jávkadit váralaš bázahussan, ja guoros páhkaid sirret seahkalašbázahusaide.
Dábálaš liikái lebbejuvvon dahje cirkkuhuvvon divregavdnjejeaddjiid sáhttá geavahit maiddái suodjalanguovlluin.