Ođđasat

Meahciráđđehus dahká arkeologalaš kártemiid Lappis

Meahciráđđehusa Luonddubálvalusaid arkeologat vulget vácci eará sajiide Lappis kártet dološbázahasaid ja earáid kulturárbečuozáhagaid. Viidásamos kártemat dahkkojuvvojit Bállás-Ylläsduoddara álbmotmeahcis, Sallai plánejuvvon ođđa álbmotmeahci guovllus ja Avviljoga golleguovllus Bátneduoddara meahcceguovllus.

Lassin dárkkistit earret eará Napapiiri vánddardanguovllu čuozáhagaid Roavvenjárggas ja unnit guovlluid Lappi máttaravddas davimus sajiide.

Meahciráđđehusa Luonddubálvalusaid bargguide gullá kulturárbečuozáhagain fuolaheapmi. Dieđu, mii boahtá arkeologalaš ja earáid kulturárbečuozáhagaid kártemis, dárbbašit guovlluid dikšuma  ja geavaheami plánema várás.

Viidásut investerenguovlluid lassin arkeologat dárkkistit dán gease máŋggaid jekkiid ovddežiiddikšunguovlluid ovdal go álggahit ovddežin dikšuma. Meahccedárkkistusat dahkkojuvvojit maiddái ovdamearkka dihtii ođđa vánddardanráhkadusaid plánema várás. Lassin dárkkistit dihtosis leahkki arkeologalaš čuozáhagaid ortnegiid.

Ohcat meahcis earálágan boares luottaid olbmo doaimmain, dego ovdahistorjjálaš ja historjjálaš ássanbáikkiid, goddebivdorokkiid, soađiáigásaš bealuštanrusttegiid dahje jekkiid ovddežiiddikšunčuozáhagain ovdamearkka dihtii luottaid lukteláddjenkultuvrras. Vejolaš gávdnosat vuhtiiváldojuvvojit guovlluid joatkkageavaheamis.

Lagamus luondduguovddážii sáhttá almmuhit, jos dus leat dihtosis kulturárbečuozáhagat.

Mielddusin leat earálágan govat kulturárbečuozáhagain. Govaid oažžu geavahit go fáttás dahkkojuvvojit ođđasat.