Ođđasat

Meahciráđđehus dahká Bállás-Ylläsduoddara álbmotmeahccái ođđa dikšun- ja geavahanplána

Dikšun- ja geavahanplána mihttomearrin lea oktiiheivehit luonddusuodjaleami, áhpasmuhttingeavaheami ja eará geavaheami Suoma bivnnuheamos álbmotmeahci, Bállás-Ylläsduoddara guovllus. Meahciráđđehus dahká ođđa dikšun- ja geavahanplána ovttas báikkálaš ássiiguin, bálgosiiguin, sámedikkiin, gielddaiguin ja earáiguin álbmotmeahccái laktásan čanusjoavkkuiguin.

Bállás- Ylläsduoddara álbmotmeahci vuovddit, jeakkit, várit ja čázádagat hábmejit áidnalunddot guovllu davvi luonddus. Luondduárvvuid lassin álbmotmeahcci lea Suoma luondduturismaguovlluin riikkaidgaskasaččat okta bivnnuhamosiin turismaguovddážiid dihtii. Guovllus lea dehálaš dorvvastit maiddái boazodoalu dárbbuid ja sámekultuvrra.

"Gos guovllus álbmotmeahci guovllu šattut, lottit ja eallit gáibidit ráfi ja luonddu ferte suodjalit hui dárkilit? Gos fas sáhttet leat ovdamearkka dihtii rovvemuorat, meahccesihkkelastinmáđijat, goađit ja earát ráhkadusat? Earet eará dákkáraš gažaldagaide dikšun- ja geavahanplána vástida", sierraplánejeaddji Ilkka Vaara dadjá.

Meahciráđđehusa Luonddubálvalusat bajásdoallá ja ovddida álbmotmehciid Suomas. Lága mielde juohke álbmotmeahcis ferte leat dikšun- ja geavahanplána. Dikšun- ja geavahanplána, mii lea dál válmmaštallama vuolde, heiveha oktii luonddusuodjaleami, áhpasmuhttingeavaheami ja eará geavaheami mihttomeriid ja dárbbuid čuovvovaš 10-15 jahkái. Go Meahciráđđehus lea nannen ođđa plána, álbmotmeahccái addojuvvo ortnetnjuolggadus.

Bállás-Ylläsduoddara dáláš dikšun- ja geavahanplána lea gárvánan jagi 2008.

Háliidatgo váikkuhit? Ná sáhtát buktit ovdan du oaivilat Bállás-Ylläsduoddara dikšumis ja geavaheamis

Meahciráđđehus dahká Bállás-Ylläsduoddara álbmotmeahci dikšun- ja geavahanplána guldalemiin guovllu geavaheaddjiid ja čanusjoavkkuid.

Olles plánema áigge čanusjoavkkuin ja buot riikkavuložiin lea vejolašvuohta muitalit oaivilis ja sávaldagas. Plánema ovdáneami sáhttá čuovvut Meahciráđđehusa neahttasiidduin (metsa.fi, suomagillii).

Meahciráđđehus ordne čanusjoavkkuide maiddái iežas dilálašvuođaid plánema áigge. Plánemis ordnejit maiddái álbmotdilálašvuođaid koronadili vuhtiiváldimin. Álbmotdilálašvuođaid áiggiid almmuhit maŋŋeleappos.

Ođđa dikšun- ja geavahanplána lea mihttomearrin gárvánit geassit jagi 2023.

Fákta: Bállás-Ylläsduottar lea Suoma bivnnuheamos

  • Bállás-Ylläsduoddara álbmotmeahcci lea jagiid áigge bisson Suoma bivnnuheamos vánddardan- ja luondduáhpasmuhttinčuozáhahkan. Jagi 2021 álbmotmeahcis ledje juobe 699 000 galledeami.
  • Álbmotmeahci viidodat lea 102 240 hehtára. Guvlui gullet Oarje-Lappi eanemus čalmmustahtti várreráidu ja dasa laktásan luonddudilis ja meahccelágažin seilon vuovde- ja jeaggeguovllut.
  • Bállás-Ylläsduoddara álbmotmeahcis ja dan lahkosis leat čuđiid kilomehteriid geasse- ja dálvemáđijat nu oanehis beaivetuvrraide go guhkes vánddardemiide.
  • Suoma boarráseamos vánddardanmáđija gávdno Bállás-Ylläsduoddara álbmotmeahcis. Heahtá ja Bállása gaskkas lean máđija lea leamašan merkejuvvon vánddardangeavaheami várás juo gitta jagis 1934.

Lassedieđut