Ođđasat

Meahciráđđehus ii vuovdde guolástanlobiid Deanu oalgejogaide dán jagi

Veahčajohkii ja Ohcejohkii, mat luitet Detnui, eai vuvdo dán jagi guolástanlobit olgobáikegoddelaččaide stáhta čáhceguovlluide. Deanu váldojoga ja oalgejogaid luossabivdu lea láhkaásahusain gildon boahtte guolástanbajis luossanáliid suodjaleami dihtii sihke Norggas ja Suomas. Eará guliid, degomat soavvila, bivdinvejolašvuođat fas lasihuvvojit Deanu váldojogas. Meahciráđđehus lea goittotge bargan mearrádusa, ahte dat ii vuovdde Deanu oalgejogaide olláge guolástanlobiid.

Meahciráđđehusa mearrádus guoská guolástanlobiide, mat vuvdojit olgobáikegoddelaččaide. Dábálaččat lobit leat vuvdon moadde čuođi. Gieldalaččat sáhttet ain guolástanlága mielde guolástit nu gohčoduvvon gieldalačča johkalobiin eará guliid go luosa.

“Meahciráđđehusa oalgejogaid lobiid earremearrádusas sohppon lohpeearit vuođđuduvvet vuosttaš sajis luosa suvdilis guolásteapmái. Eará šlájaid, dego ovdamearkka dihte soavvila, suvdilis guolásteapmi ii leat mihttejuvvon earremearrádusas. Mii vásihit, ahte dán dilis lea vásttolaš, ahte Meahciráđđehus ii vuovdde guolástanlobiid olláge, dasgo luossabivddu sadjái gieldalaččaid bivdodeaddu čuohcá dál vuordimis erenomážit soavvilii”, meahccedoallohoavda Pirjo Ilvesviita muitala.

Deanu oalgejogaid guolástančuozáhagat leat mihá uhcit. Daid soavvelnálit eai leat seammá nannosat go Deanu váldojogas. Meahciráđđehus berre sihkkarastit, ahte lassáneaddji, báikkálaš soavvelpopulašuvnnaide čuohcci guollebivdu ii áitte soavvelnáliid. Seammás sihkkarastojit báikkálaš ássiide doarvái guolástanvejolašvuođat dakkár áigge, goas luosa ii spiehkkaseaddji láhkái oaččo bivdit.

Guolástanlobiid vuovdin Lappi eará čuozáhagaide lea dál jođus. Mearrádus guoská dušše čuozáhagaide 1571 Veahčajohka ja 1572 Ohcejohka.

Loga lasi

Lassidieđut