Ođđasat

Ođđa meahccebearráigeahččooaivámuš ohcá bearráigehččui fámu ovttas eará virgeoapmahaččaiguin

Boleskomissára Henri Pelkonen, 35, lea válljejuvvon Meahciráđđehusa ođđa meahccebearráigeahččooaivámužžan. ”Sáhtášin dadjat, ahte niehkobargu.” Dál Pelkonen bargá Oulu boleslágádusa lohpeovttadaga hoavdan. 



Pelkonen johtá iešge meahcce- ja guollebivddus. Su skuvlejupmi lea hálddahusdiehtagiid magisttar. Loahppabarggustis son lea dutkan Meahciráđđehusa meahccedárkkisteaddjiid doaibmafápmudusaide gullevaš juridihka meahccebivddu bearráigeahčus. 

”Meahccebearráigeahču sáhttá beavttálmahttit ain virgeoapmahašovttasbarggu buoridemiin. Lassin mun áiggun dahkat dan maid nagodan meahccedárkkisteaddjiid doaibmafápmudusaid ovdii”, Pelkonen dadjá. 

Bivdodoallohoavda Jukka Bisi atná meahccebearráigeahččooaivámučča virggi guovddáš doaibman Meahciráđđehusas. Maiddái su mielas dihtui vuođđuduvvan ja plánejuvvon bearráigeahču dárbbašit ain lasi. Bisi sávvá, ahte meahccebearráigeahču, rádjegohcima ja bolesa ožžon diehtu livččii ain buorebut buot virgeoapmahaččaid anus.  

”Luonddus lihkadeapmi lea dálááigge treanda. Mađi eanet dat lassána, dađi eanet dasa gullet maiddái riskkat”, Bisi gávnnaha. 

Ođđa meahccebearráigeahččooaivámučča joavkkus doibmet dál 13 meahccedárkkisteaddji, geat vástidit stáhta guovlluid bearráigeahčus iežaset doaibmaguovllusteaset. Sesoŋŋaáiggiid meahccebearráigeahčču lasihuvvo mearreáigásaš meahcce- ja guollebivddu bearráigeahččiin. 

Meahccedárkkisteaddjit bearráigehččet maiddái vánddardeami luonddusuodjalanguovlluin ja meahccejohtalusa. Jahkásaččat meahccebearráigeahčču dárkkista sulaid 10 000 luonddus johtti. 

Loga lasi