Ođđasat

Rautulampi stobuid huksen ovdána Urho Kekkonen álbmotmeahcis

Rautulampi stobuid huksen Urho Kekkonen álbmotmeahcis lea bures áigetávvalis. Siivvuhis áigái huksenbargu boatkana boddui, muhto joatkašuvvá geassemánu loahpas. Boahtte ruškki áigge vánddardeaddjit sáhttet beassat juo návddašit ođđa stobuid fállan suojis. Bargoeana gárvána borgemánus plánaid mielde.

Stobut huksejuvvojit ruossalassii liibmejuvvon muorraelemeanttain. Elemeantahuksema ja agoartaváldi fuolalaš ovddalgihtii bargojuvvon válmmaštallamiid ánssus beaivestohpu ja ávdinvárrenstohpu ceagganedje stuorimus oassái ja olggožat buorre muddui juo dálvesiivvuid áigge. Maiddái elemeanttaid fievrrideapmi huksenbáikái lihkostuvai giđđacugŋuid mielde.

Álbmotmeahcci lea luonddusuodjalanguovlu, gos háliidit garvit badjelmearálaš eanavaháguvvamiid. Huksenbargoeana báhcáge dál siivvuhis áigái boddui, vai eana oažžu goikat ráfis iige johtin dagat badjelmearálaš luottaid. Huksen joatkašuvvá fas geassemánus.

"Siivvut ja dilit dahket bargoeatnamis hástaleaddji, muhto áššit leat ovdánan bures", muitala Rautulampi hovdejeaddji meašttir Jeremi Rekonen Rakennusliike Rekonen Oy:s.

Oahpes bálvalus ođđa pakeahtas

Rautulampi ođđa stobuid háliidedje doaibmat buorebut. Sisoasit leat viehka árbevirolaččat, muhto doaibmama lasiha earet eará goikadanlatnja ja olgofeaskkir, mii leahkkasa guovtti guvlui.

Suhtu ja nuppe dáfus maiddái giitosiid boktán stobuid olggoš lea smihttojuvvon dárkilit. Guoldduid dihtii stobuin leat oanehis reastalasat, boares stobus biegga doalvvui gáhtu, go das lei guhkes reastalas. Aerodynámalaš hábmemin, čuoldavuođuin ja bieggahálttiid smiehttamin figgat dasa, ahte duottarbiekkat eai daga skálvviid badjelmeare gáhtuid ala dahje olgouvssaid ovdii.

Olgoseainnit ožžot birrasa ivnniide heivvolaš fielloskoađđasa. Stuorra glásat luitet sisa ain eanet čuovgga. Glásain sáhttá maiddái buorebut geahčadit birrasa duottareanadaga.
 

Árbevirolaš stobuid gáhttejit maiddái

Eará sajiin Lappis leat vánddardeddjiide galledeami várás sullii 170 árbevirolaš ávdinstobu, maid Meahciráđđehusa Luonddubálvalusat gáhtte. Rautulampii bohtet dál guokte ođđaáigásaččabu stobu mat bálvalit lassánan galledeaddjimeriid ja ođđa dárbbuid.

Sihke ođđa ávdin- ja várrenstohpui čáhket idjadit 10 olbmo. Beaivestohpuige čáhket bosihanboddui eanet olbmot hávil go ovdal. Stobuid lassin huksejuvvo hivsset ja muorravisti, mat doibmet buorebut.

Maŋimustá čakčat beassat iskkadit ođđa stobuid atmosfeara.

Lassedieđut