Meahciráđđehusa Luonddubálvalusat ovttas sámedikkiin leat vuođđudan bargojoavkku, mii guorahallá Bállás–Ylläsduoddara álbmotmeahci boahttevaš jagiid plánaid sámiid geahččančiegas. Mihttomearrin lea sihkkarastit, ahte álbmotmeahci boahttevuođa plánain eai šatta hehttehusa eamiálbmogii.
Bállás–Ylläsduoddara álbmotmeahcis lea dál jođus dikšun- ja geavahanplána beaivádeapmi. Plána linnje ovdamearkan, gosa Bállás–Ylläsduoddara álbmotmeahcis huksetjit boahttevuođas vánddardanjohtolagaid ja gos fas ráddjet lihkadeami. Dikšun- ja geavahanplána lea fámus 10-15 jagi.
Dán rádjai oainnuid álbmotmeahci boahttevuođas leat čoaggán čanusjoavkodilálašvuođain, buohkaide rabas dilálašvuođain birra álbmotmeahci ja neahttajearahallamiin, masa bohte olu vástádusat, oktiibuot 1100 vástádusa.
– Leat jo ávkkástallan oainnuid ovdamearkan álbmotmeahccái dehálaš árvvuid válljemis. Čoggojuvvon oaivilat leat dehálaččat maiddái plánema čuovvovaš muttuin, go meroštallat álbmotmeahci boahttevuođa mihttomeriid ja doaibmabijuid. Dál vuođđuduvvon bargojoavkkuin háliidat sihkkarastit, ahte guovllu sámekultuvra boahtá sihkkarit váldojuvvot vuhtii ođđa dikšun- ja geavahanplánas, eanageavaheami áššedovdi Ilkka Vaara Meahciráđđehusa Luonddubálvalusain muitala.
– Lea dehálaš, ahte Akwé: Kon -bargojoavkku oainnut sápmelaččaid dárbbuin guovllu ávkkástallamis hábmejuvvojit doaibmabidjun beaiváduvvon dikšun- ja geavahanplánas. Dáinna dorvvastit árbevirolaš dieđu seailuma, sámedikki sátnejođiheaddji Tuomas Aslak Juuso dadjá.
Bargojoavkku bargu bistá dan rádjai, go dikšun- ja geavahanplána lea gárvvis. Bállás-Ylläsduoddara álbmotmeahci ođđa dikšun- ja geavahanplána gárvvásmuvvá jagi 2024 bealde.
Sámiid oainnuid plánemii buktán bargojoavkku sátnejođiheaddjin válljejuvvui Maritta Stoor-Lehtonen dán vahkus.
– Álbmotmeahci sápmelaš historjjá lea dehálaš dovdat. Áidnalunddot guovllu galgá suodjalit ja seailluhit boahttevaš sohkabuolvvaide, Stoor-Lehtonen dadjá.
Bargojoavku doaibmá Akwé: Kon -doaibmamálle mielde. Akwé: Kon -doaibmamálle ovddida sápmelaččaid sajádaga: eamiálbmot sáhttá oassálastit iežas guoskevaš áššiid dahje sidjiide guoskevaš fidnuid dahje plánaid buot muttuide. Ná árbevirolaš diehtu, innovašuvnnat ja geavadagat bohtet oassin plánaproseassas ja fidnuid ja plánaid vahátlaš váikkuhusat eamiálbmogii gávnnahuvvojit ja váldojuvvojit vuhtii mearrádusdahkamis.