Ođđasat

Skábma boahtá Davvi-Sápmái

Dál lea fas dat áigi jagis, go beaivváš njiedjá gulul albmeravdda vuollái measta guovtti mánnui davimus Sámis. Beaivváš badjána Njuorggáma gilis Ohcejogas maŋimuš geardde duorastaga 24.11. Čuovvovaš geardde beaivváš goargŋu doppe horisontta bajábeallái ođđajagimánu 28. beaivve.  

Ovddabealde ritnemuorat. Duogábealde jávri ja vuovdi man guovdu badjánit muohtavárit dipma čuovggas.
 

Ohcejogas skábma álgá guokte beaivvi maŋŋelut go Njuorggámis, maiddái nohká guokte beaivvi árabut. Anáris beaivváš njiedjá maŋimuš geardde 2. juovlamánu, ja bissu čihkosis badjelaš mánotbaji. Soađegilis váile vahku guhkkosaš skábma lea juovllaid áigge.

Mierkái measta čáhppesvilges eanadat. Ovddabealde muohta johkadearbmi, mas rinereatkkámeastta ja lastamuorat. Guovdu johka man rastá lea šaldi.
 

Guhkes ja liegga čavčča maŋŋá buollašat leat boahtán Anára ja Ohcejoga guovlluide. Moatti maŋimuš vahku áigge mihttárlogut leat leamašan logi ja guovttelogi buolašceahki sulain. Unna jávrrit leat jikŋon, muhto rávdnječázit ja stuorát jávrrit leat easkka jiekŋumin. Jieŋaid alde johttit galget smiehtastit ja sihkkarastit jieŋaid assodaga ovdal mannama jieŋaid ala.

Ovddabealde gurut bealde muohttaga gokčan gáddi ja lasttahis muorat ja miestagat. Vuosttabeale gáttis goahccevuovdi ritnin. Guovdu joga jikŋon aláš, mii lea oassái šerres jiekŋa ja oassái ritni vuolde.

Muohta lea jagiáiggi ektui vel unnán. Muohtagokčasa gassodat logemat sentte. Asehis muohtagovččas ja buollašat veahkehit čázádagaid jiekŋut jođáneappot ja jieŋaid gassut.

Jiekŋakristállain šaddan rássehámit jieŋa alde.