Buot golbma mannan gease Suomas šaddan njálačivggat leat dihtton dálvvi áigge duoddariin biebmanautomáhtain borramin beatnatbiepmuid. Vaikke davvinge leamašan viehka bivvalis dálvi, čivggat orrot leamen eallinnávccalaččat. Meahciráđđehusa Luonddubálvalusat ordne guovvamánus golbma njállaeahkeda Lappi luondduguovddážiin.

– Bivvalis dálvvis fuolatkeahttá duoddariin ii leat arván, mii livččii váttásmahttán goddesáhpániid eallima. Goddesáhpánat leat njála lunddolaš biebmu. Goddesáhpániid menestupmi váikkuha njuolga maiddái njálaid ceavzimii, vaikke njálačivggat borretge biebmanautomáhtain beatnatbiepmuid, luonddusuodjaleami sierraáššedovdi Tuomo Ollila Meahciráđđehusa Luonddubálvalusain muitala.

Meahciráđđehusa Luonddubálvalusat vástida njála suodjaleamis Suomas. Suodjaleapmi oaivvilda geavatlaččat golmma ášši: njála lassebiebmama, riebanbivddu ja njálaid luoitima Suoma rájá lahkasii Norgga beale gárddis. Mihttomearrin lea, ahte boahttevuođas njálla ceavzzášii almmá lassebiebmama.

Suomas njála suodjalanbarggu leat dahkan aktiivvalaččat badjelaš logi jagi ovttas Norggain ja Ruoŧain. Bohtosiid ožžo mannan gease, go Suomas earenoamáš áittavuollásaš njálla bessii vuosttas geardde 25 jahkái.

Juohke vánddardeaddji sáhttá oassálastit njála suodjalanbargui: doalvu ruskkaid ja biebmobázahusaid eret duoddariin

Rieban lea njála gilvaleaddji, mii lea dálkkádatrievdama ja lassánan biebmu geažil laskan ain eanet duoddariin. Riebanbivdu gullá deaŧalaš oassin njála suodjalanbargui. Jahkásaččat bivdojuvvojit 50-500 riebana duoddariin, vai dat eai doalvvošii njála bessensajiid ja biepmu.

– Lea dehálaš, ahte vánddardeaddjit dolvot duoddaris ruskkaid ja biebmobázahusaid mielddiset, amas eai dat šatta riebaniid biebmun. Ruskkahis vánddardeapmi lea maiddái njála suodjaleapmi, man juohkehaš Lappis vánddardan olmmoš sáhttá dahkat, Ollila muittuha.

Boađe gullat ságaid njálas luonddueahkediin Anáris, Pyhätunturis ja Sallas guovvamánus

• 14.2. Sámemusea ja Davvi-Sámi luondduguovddáš Siida (Anár) dmu 18–19.30.
• 22.2. Salla luondduguovddáš (luontoon.fi, suomagillii) (Salla Wilderness Park) dmu 16–17
• 23.2. Luondduguovddáš Naava (Pyhä, Pelkosenniemi) dmu 16–17 

Buot luonddueahkediin njála birra muitala šlája suodjalanbarggu dahkan luonddusuodjaleami sierraáššedovdi Tuomo Ollila Meahciráđđehusa Luonddubálvalusain.