Ođđasat

Urho Kekkonen álbmotmeahcis dahket geassit divrečielggadusaid

Meahciráđđehusa Luonddubálvalusat dahká dán geasi Urho Kekkonen álbmotmeahcis divrečielggadusaid earret eará ovddežiiddahkanboaldinčuozáhagas ja árbebiotohpas. Guovllus leat árabut dahkkojuvvon dušše unnán divrečielggadusat. Áigeguovdilis luonddudiehtu lea vuođđun buot luonddudikšumii ja guovlluid suvdilis geavaheapmái. Čielggadusbargu meahcis dahkkojuvvo aktiivvalaččat áiccademiin divrehoava fađđumiin, muhto maiddái stellemin meahccái earálágan divrebivdosiid. 

Viiddis Urho Kekkonen álbmotmeahcis leat árabut dahkkojuvvon dušše beare muhtun divrečielggadusat. Dán geasi čielggadusain oažžut veháš lassedieđu das, makkár divrešlájat loktet Lappi árbebiotohpain ja makkár divrrit dollejit aiddo ovddežiidboldojuvvon davvi meahccái.

Árbebiotohpat leat okta eanemus áittavuloš ja šládjarikkis eallinbirrasiin. Davvi árbebiotohpaid divrešlájaid dovdet goittotge funet. Geassit áššái boahtá lasi čielggusvuohta, go álbmotmeahci máttaoasi boares šilljogietti šlájat kártejuvvojit.

Nubbi kártenčuozáhat lea aiddo ovddežiidboldojuvvon meahcceguovlu álbmotmeahci máttaoasis, ja goalmmát lunddolaš vuovdi álbmotmeahci oarjeoasis. Buot čuozáhagaide dolvojuvvojit divrebivdosat. Dat dárkkistuvvojit dihto áigegaskkaid, ja seammás maiddái dahkkojuvvo šládjaáiccadeapmi báikki alde.

Vánddardeaddji sáhttá nube álbmotmeahcis jođedettiin deaivat divrehoava fađđon luonddukártejeaddji dahje meahccái stellejuvvon divrebivdosiid. Sávvat ahte olbmot eai guoskka bivdosiidda. Čielggadusa dahkan luonddukártejeaddji sáhttá baicce bissehit ja jearrat sus lasi dán barggus.

Áigeguovdilis luonddudiehtu lea vuođđun buot luonddudikšumis ja guovlluid suvdilis geavaheamis. Divrečielggadusat dego earátge luonddukártemat leat oassi Meahciráđđehusa luonddusuodjalanbargguin luonddusuodjalanguovlluin.

Ovddežiidboldojuvvon guovllu divrekárten lea oassi EU:a ruhtadan Beetles Life -prošeavtta, mas dahket eallinbirrasiid hárvenaš divrriide, mat gáibidit buollinguovlluid. Dáid joavkkus leat maiddái máŋggat Suoma riikkaidgaskasaš ovddasvástádusšlájat, maid čuovvumis, suodjaleamis ja dutkamis mis lea earenoamáš ovddasvástádus.

Lassedieđut