Darvvátvári luondu

17.1.2022
Oahpásmuva koronadorvvolašvuođarávvagiidda ovdal go vuolggát tuvrii dahje galledat luondduguovddážiin.

Liminganlahti luondduguovddáš lea gitta 1.1.-4.2.2022. Suoma luondduguovddáš Haltia lea gitta 10.1.-1.2.2022. Koli luondduguovddáš Ukko lea gitta 1.1.-26.1.2022. Kuusamo bálvalanbáiki Karhuntassu lea gitta 13.1.-31.1.2022.

Suoma eará luondduguovddážiin gáibidat ámadadjosuoji geavaheami ja 2 m dorvogaskka čuovvuma. Lassin anus sáhttet leat koronapássa ja/dahje áššehasmearri ráddjejuvvon. Dárkkis dieđuid luondduguovddážiid siidduin. Ráddjehusaid fámusáigi lea guvllolaš. Dárkilut guvllolaš dieđut (suomagillii) leat guovlluhálddahusdoaimmahaga siidduin.

Beahcevuovddi davvirájis duoddarii

Darvvátvári meahcceguovllu lulábealde lea oktilaš beahcevuovddi rádji, man maŋŋel gávdnojit dušše ovttaskas beazit. Beahcevuovddit leat oaidnit váldooasis oalle šattoheamit ja dain lea ollu jeagil. Muoraid guhkkodat lea dábálaččat vuollil logi mehtera. Beahcevuovderáji davábeale leat marrasat ja viiddes jeakkit. Meahcceguovllu davveosiin leat duoddarat.

Darvvátvári meahcceguovllu beahcevuovddi eananráješattut leat dábálaččat váldooasis jeahkálat ja dakŋasat, muhto báljesduoddaris dat molsašuvvet sitkes daŋasin.

Guovllus šaddet maid hárvenaš šlájat dego duottarsámmal, jeaggenarti (opmonarti) ja johkahávvar (sámehávvar).

Valjis loddenálli ja máŋggalágan eallit

Guovllu molsašuddi luonddu ánsus guovllusgávdnojit ollu eallit. Eallinbirrasat rivdet davvelii manadettiin beahcevuvddiin ja jekkiin duottarin. Guovlu mearkkaša ollu lottiide, danne go doppe leat ollu áitatvuloš loddešlájat, dego goaskimat, duottarfállát (rievssatfálli) ja suotnjovirožat.

Buot min riikka stuora boraspiret gávdnojit dán guovllus aŋkke soaittáhagas. Guovllu hárvenaš eallit leat gumpe ja guovža. Albbas ja geatki sáhttetfas muhtun áiggit leat oalle ollu nai. Čeavrát leat dán guovllus hui unnán. Guovllu buot eanemus áitatvuloš njiččehas lea njálla.