Ođasvuorká

Back

Lappi álbmotmehciid galledeaddjimearit lassánedje ain jagi 2018

1/31/19
Lappi turismma lassáneapmi ja davvi luonddu geasuhusfápmu loktejedje Lappi čieža álbmotmeahci galledeaddjimeriid jagi 2018 olahuslaš 1,33 miljovnna galledeapmái ja álbmotmeahccegalledeaddjiid ruhtageavaheami váikkuhusat álbmotmehciid lahkasiin ledje 118 miljon euro. Miehtemielalaš ovdáneami ja lundui vuođđuduvvan turismma suvdilisvuođa uhkida goittotge álbmotmehciid ruhtadeami áitán njiedjan.
 
Lappis ja olles Suomage ektui stuorámus absoluhtalaš lassáneapmi lei Pyhä-Luosto álbmotmeahcis, gos ledje 174 400 galledeami, mii lea 25 300 galledeami eanet go ovddit jagi. Maiddái Urho Kekkonen, Riisitunturi ja Leammi álbmotmehciin lassánedje galledeaddjimearit čielgasit. Bállás-Ylläsduoddara álbmotmeahci bissu njunnošis Suoma bivnnuheamos álbmotmeahccin 549 000 galledemiin. 
 
Buot Suoma álbmotmehciide dahke mannan jagi sulaid 3,2 miljon galledeami.
 
Vádjolusas Leammis. Govva: Kirsi Ukkonen.
 
Galledeaddjimeriid lassáneami mielde álbmotmeahccegalledeaddjiid ruhtageavaheami oppalašsisaboahtováikkuhusat lassánedje mannan jagi measta 118 miljon euroi. Oassái galledeaddjiin álbmotmeahcci lei mátkki áidna dahje deháleamos čuozáhat, ja singe ruhtageavaheami sisaboahtováikkuhus guovlluekonomiijai Lappis ledje 82 miljon euro.
 
Liegga geassi geasuhii álbmotmehciide
 
Báhkka geassi ii Lappis vuojehan olbmuid sisa suoivanii, muhto oalgguhii lundui. Bievlaáigge galledanmearit lassánedje earrát eará Pyhä-Luostos ja Bállás-Ylläsduoddaris. Dálkki lassin maiddái varas vejolašvuohta meahccesihkkelastimii dáin álbmotmehciin lea sihkkarit leamašan okta geasseturismma geasuhus. Eandalii movttiidahtti lei dat, ahte árabut oalle jaskes miessemánnu lei ealaskeappo Pyhä-Luostos, ja ođđa gollemáđija rahpan buvttii Leammi álbmotmeahci geassái lasi vánddardeaddjiid. Luondduturismadoaibmiid ovttasbargu Lappi geasseturismma lasiheapmin buktigoahtá bohtosa.
 
Hástalusat álbmotmehciid fuolaheapmái
 
Lappi luondu geasuha ain eanet olbmuid vánddardit ja loaktit álbmotmehciin ja návddašit luonddu buresbirgejupmeváikkuhusain. Álbmotmehciid ruhtadeapmi lea njiedjamin, ja galledeaddjimeriid lassánettiin dat oaivvilda vehábut ruđa geavahuvvot ovtta galledeaddji guovdu álbmotmehciid fuolaheapmái, dego gollan ráhkadusaid ođasmahttimii, bázahusfuolaheapmái ja boaldinmuoraid skáhppomii ja dan bokte luondduturismma suvdilvuhtii.
 
“Turismma suvdilvuhtii gullet olu sierra oassedahkkit. Lundui dorvvastan turismma bokte mihtilmas lea čuozáhagaid luondduárvvuid seailun. Jus álbmotmehciid ja eará bivnnuhis luonddučuozáhagaid bálvalanráhkadusaide ii sáhte investerejuvvot, de geavaheami stivren áitojuvvo, mii fas uhkida luondduárvvuid”, Luonddubálvalushoavda Timo Tanninen gávnnaha.
 
Lappi álbmotmehciid galledeaddjimearri 2018
 
  • Bállás-Ylläsduoddara álbmotmeahcci 549 200
  • Urho Kekkonen álbmotmeahcci 340 500
  • Oulanka álbmotmeahcci* 199 500
  • Pyhä-Luosto álbmotmeahcci 174 400
  • Riisitunturi álbmotmeahcci 41 100
  • Leammi álbmotmeahcci 16 900
  • Mearrabađa álbmotmeahcci 5 800
*Oulanka álbmotmeahci viidodagas sulaid 40% Lappi eanagottis.
 
 
 
Lassidieđut
 
  • Bállás-Ylläsduoddara álbmotmeahcci, álbmotmeahccehoavda Pekka Sulkava, telefon 0400 815660
  • Pyhä-Luosto álbmotmeahcci, álbmotmeahccehoavda Hely Juntunen, telefon 0400 219287
  • Leammi ja Urho Kekkonen álbmotmeahcit, álbmotmeahccehoavda Pirjo Seurujärvi, telefon 0400 125782