Ođasvuorká

Back

Njálaid beassedárkkistusain eai gávdnon bessemat diibmá

1/11/19

Njálla lea Meahciráđđehusa Luondobálvalusaid vástušládja. Meahciráđđehus oktasašbargoguimmiiguin bargá jahkásaččat njállabesiid dárkkistemiid šlája dili čielggadeami várás. Diibmá ii gávdnon oktage bessen. Maŋimuš sihkkaraston beassádaga gávdnomis lea badjel moaddelot jagi áigi.


Jagi 2018 dálvit ja geassit bargojedje buohkanassii 357 dárkkistusfitnama 247 njála beassái, mat leat dieđus. Eanodagas gávdnui ođđajage-guovvamánu áigge okta njála geavahan beassi. Loahppadálvvis ja geassit beassi ii lean šat ássojuvvon.

Dan lassin Eanodagas ja Ohcejogas leat sihkkaraston dieđu mielde oaidnán máŋgga háve njálaid ja maiddái leat vuohttán njála luottaid, muhto diehtu bázii eahpesihkkarin.

Njálaid lassibiebman. Govva: Aimo Leppäkangas.

Muolddahiid ja goddesáhpániid mearit ledje uhcánaččat, ja maiddái njála gilvaleaddji šládja, riebanat ledje duoddariin čielgasit uhcit  go jagi 2017. Fuopmášumit besiin ássan dahje johtán riebaniin registrerejuvvojedje buohkanassii 34 sierra beasis, lassin gávcci beasis ledje mearkkat beasi roggamis muhto roggi bázii eahpečielggasin.

Meahciráđđehusa njállaregistaris lea 334 njála-/riebanbeasi, main ráhpadis 100 beasi lea nu vearrát gahččan, ahte dat eai leat šat juohke jagi dárkkisteamis fárus. Giehtaruohttasa guovllus dárkkistemiide oassálaste Meahciráđđehusa lassin Luondduriggodatguovddáža bargoveahka ja eaktodáhtolaš bargit.

 

Oktasašbargu Ruoŧain ja Norggain


Jagi 2017 álggus álggii Suoma, Ruoŧa ja Norgga oktasaš golmmajahkásaš EU:a
ruhtadan Interreg Nord ”FELLES FELLREV NORD”-prošeakta njála suodjaleami ovddideami várás. Prošeavtta váldokoordináhtor lea Ruoŧas Norrbottena leanaráđđehus ja Suomas fárus leat Meahciráđđehusa Luondobálvalusat.

Prošeavtta deháleamos ulbmilat leat Fennoskándia njállanáli nannen, oktasaš
doaibmavugiid ovddideapmi njállanáli čuovvuma ja suodjaleami várás sihke diehtojuohkin njála
mearkkašumis duottarluonddu dili indikáhtoran.

Jagi 2018 prošeavtta geavada doaibman ledje ee. riebaniid bivdin, njálaid lassibiebman,
čuovvuma beavttálmahttin. Lassibiebmama vejolažžan dahkamis lea fárus maiddái WWF. Prošeavtta olis maiddái WWF:a skuvlen vuosttas eaktodáhtolaš bargit oassálaste njállabesiid čuovvumii.


Lassidieđut