Ođasvuorká

Back

Ohcan Meahciráđđehusa sávzaguođohanvahkuide álgá - DÁL

1/15/19

Superbivnnuhis Meahciráđđehusa sávzaguođohanvahkuid almmuheapmi lea rahppojuvvon. Beroštuvvan olbmot sáhttet ohcat agimuittolaš guođohanvahku fiinna láigobarttas álbmotmeahci dahje eará suodjalanguovllu eanadagas. Suoma buoremus eanadatdahkun 2016 bálkkašuvvon Guođohanvahkut leat dahku luonddu máŋggahámatvuođa ovdii. Lassin vahkku luonddu guovdu addá guođoheaddjái mearkkašahtti buresbirgejupmeváikkuhusaid. Ohcan álgá odne maŋŋebárgga 15.1.2019 dmu 12 ja lea rabas 22.1. dmu 12 rádjai.

Govva: Marinella Himari.

Ohcan geasi 2019 guođoheaddjin lea rahppojuvvon

 
Geasi 2019 sávzaguođoheaddjit ohccojuvvojit fas. Sávzaguođoheaddjit vuorbáduvvojit almmuheaddjiid joavkkus guovvamánu áigge. Sávzaguođohanmávssuin berrojuvvo máksu. Govttolaš mávssuin boahtán sisaboađut geavahuvvojit báikkiid bajásdoallamii ja luonddudikšuma goluide.
Guođohanvahkus guođoheaddji láigoha doalu vahkkui fiinna eanadagaid gasku ja lassin oažžu vejolašvuođa rájakeahtes ealliterapiijai njávkama gáibidan sávzzaid ja eanet iehčanas davvisuomagusaid luhtte. Koli guođohanbáikkiin sáhttá guođoheaddiin leat boahtte gease vejolašvuohta beassat maiddái heasttaid dikšut.
 
Guođohanvahkuid stuorra bivnnutvuođa dihtii rahppojuvvojit guokte ođđa guođohanbáikki: Oulujärvi Ärjänsaari ja Mearrabađa Pensaskari. Luonddudikšun guođohanvahkuid olis dahkkojuvvo boahtte gease buohkanassii 174 vahku 14 sierra báikkis.
 
Guođoheaddjiid doaimmaide gullet molsut ráinnas čázi ealliide, čuovvut ealliid dili ja sirdit daid láidomis nubbái. Ealliid lea ávžžuhahtti maiddái rehkenastit beaivválaččat, vai vejolaš gárgidan ealliid oažžu gitta. Dálu sturrodaga mielde guođoheaddji sáhttá váldit mielde maiddái bearraša dahje ustiba guođohanguoibmin.
 

Ávki lundui, buresbirgejupmi olbmui

Govva: Marinella Himari.

Ealliid láiddomat leat áittavullosaš árbebirrasat. Go eallit borret dábáleamos ja gilvvohallamis buoret birgen šattuid, dahket dat seammás saji hárvenaš niitošattuide. Almmá guođoheami niittut savvojit ja máŋggat čáppa, muhto hárvenaš šaddošlájat eai birgešii. Guođoheapmi rigguda luonddu máŋggahámatvuođa. 
 
Guođohanvahkku luonddu guovdu buorida fysalaš ja vuoiŋŋalaš buresbirgejumi. Ealliid doaimmaid čuovvun ja sávzzaid njávkkadeapmi lotkkodahttá ja láivuda váddáseamosge streassa. Persovnnalaš buresbirgejumi lassin guođohanvahkuide oassálastit dahket vejolažžan kulturhistorjjálaš árbbi seailuma historjjálaš doaluid árbevirolaš luonddudikšumiin. 
 
Meahciráđđehus Luonddubálvalusaid bargoveahka oahpásmahttá ođđa guođoheaddjiid, nuba ovddit vásáhus sávzzaid dahje gusaid dikšumis ii dárbbaš leat. Guođoheaddjit sáhttet háliidettiin oassálastit maiddái eará álbmotmeahci bargguide. Áigi báhcá ealliid dikšuma olis maiddái ovdamearkan vánddardeapmái.
 

Anára ja Ohcejoga guođohanbáikkit

Anáris guođohanvahkut ordnejuvvojit Leammi álbmotmeahcis Gáppe-Jon báikkis ja Ohcejogas Jeagelveaji sámedoalus. Geasi 2018 ohcamis dat ledje bivnnuheamos guođohanbáikkit.
 

Sávzaguođoheaddjin Jeagelveaji sámedollui

Govva: Marinella Himari.
Jeagelveaji sámedoallu lea Deatnogáttis s. 25 km Ohcejoga kirkosiiddas Njuorggáma guvlui. Jeagelveajis sávzaguođoheaddji idjada eakti sámedoalus, mii lea vuođđuduvvon jo 1858. Jeagelveaji sámedoallu lea museačuozáhat, man šilljobirrasii lea friddja beassan juohkeolmmošvánddardeaddjiin ja doppe sáhttet galledit maiddái joavkkut. Váldovistái šihttet álkit idjadit 4 olbmo, visti lea saddjái ja doppe leat maiddái málesteapmái dárbbašlaš biergasat. Visttis lea šleađga. Sávzaguođoheaddjit birastahttet šilljobirrasa. Šiljus lea maiddái sávdni, gos lea vuogas finadit Deanus virkkosmuvvamin.
 
Sávzaguođohanvahku haddi jagi 2019 lea 450 euro. Guođoheaddji sáhttá váldit beatnaga mielde, muhto beana galgá dollot gitta. Jeagelveajis guođohanvahkku lea álo bearjadagas bearjadahkii ja guođohanáigodat bistá geassemánu loahpa bealde borgemánu lohppii.
 

Sávzaguođoheaddjin Leammi álbmotmeahccái Gáppe-Jon báikái

Govva: Tuija Kangasniemi/MH.
Gáppe-Jon báiki lea Leammi gáttis, ja doalus idjadit bures 4 olbmo. Visttis lea šleađga ja juhkančázi oažžu gáldus. Vistti duogábealde lea Leammi álbmotmeahcci oktan vánddardanvejolašvuođaiguin. Guođoheaddjiin lea anus maiddái suhkanfanas, mii dárbbašuvvo johtimii Njurgoluovtta gillái, go báikái ii leat geaidnu ja dat lea joga nuppe bealde. Fanasmátki gillái lea sulaid 2 km. Muorain liggejuvvon sávdni šiljus fállá ássiide lievllaid.
 
Sávzaguođohanvahku haddi jagi 2019 lea 500 euro. Guođohanvahku áigi lea lávvardagas lávvardahkii ja guođohanáigodat bistá borgemánu lohppii. Guođoheaddji sáhttá váldit beatnaga mielde, muhto beana galgá dollot gitta. 
 

Lassidieđut