Spiehkastatjagit 2020–2021 orrot lokten stáhta guovlluid meahccebivddu bivnnutvuođa bissovaččat. Diibmá Meahciráđđehusas háhkkojuvvoje oktiibuot 185 526 bivdin- ja guolástanlobi. Mearri manná ovddit jagi lobiid badjel 6 000 bihtáin ja koronajagiid ovddit dási 20 000 bihtáin. Bivdinlobiid jearru livččii máŋgga čuozáhagas vel stuorit, muhto bivdu ja guolástus ráddjejuvvo dihtomeriiguin.
Bivdinlobit leat ostojuvvon sulaid 85 000 bihtá juo njealji jagi áigge maŋŋálaga. Lohpemearri ii dás sáhte olus stuorrut, daningo Meahciráđđehus dorvvasta suvdilis fuođđomáddodagaid ja nu daddjojuvvon sosiálalaš suvdilvuođa nu ahte dat ásaha guovllu- ja čuozáhagaguovdasaš dihtomeriid.
Guolástanlobit stáhta čáziide háhkkojuvvoje 101 258 bihtá, mii lea čielgasit ovddit jagi eanet. Maiddái máŋggaide guolástančuozáhagaide lea eanet jearalámás go maid lobit sáhttet mieđihuvvot. Earenoamážit Lulli- ja Gaska-Suoma guoikkat ja máŋggat Sámi jogat leat čuozáhagat, maidda buot dáhtolaččat eai oaččo lobiid.
Sihke bivdiide ja guolásteddjiide gávdnojit goitge oba sesoŋŋa áigge čuozáhagain, mat eai gula meahccebivdiid bivnnuthepmosiidda. Vaikko earenoamážit eananloddelobit vuvdojuvvojit bivnnuheamos čuozáhagain lohppii, de oba riikka dihtomearis vuvdojuvvo jahkásaččat dušše sulaid 80 proseantta.
”Eará smávvafuođđu go eanalottiid stáhta eatnamiidda čágale bivdit eanetge. Bivdit háhke mannan bajis dušše 22 proseantta čáhcelodde- ja njoammellobiin, mat ledje vuovdimassii”, bivddu njunušáššedovdi Ahti Putaala dadjá.
Eananloddebivdu beroštahttá bivdiid
Bivdit oidet stáhta eatnamiin eanaloddebivddu. Buot háhkkojuvvon bivdinlobiin 79 proseantta leat eanaloddelobit. Eanemus bivdinlobit ostojuvvoje Suovvaguoikka Narusta-Tuntsa ja Vintilä guovlluide sihke Yli-ii ja Puolanka bivdoeatnamiidda. Juohkehažžii dain vuvdojuvvoje badjel 1500 bivdinlobi.
Loguin eai leat mielde sarvvabivdinlobit, danigo sarvvabindinjoavkkut ohcet Meahciráđđehusas guovlluid, eaige ovttaskas bivdinlobiid. Diibmá stáhta guovlluid joavkkuin bivde oktiibuot 26 961 bivdi. Sarvvabivddu bivnnutvuohta lea maŋemus jagiid njiedjan veaháš, seamma go sarvamáddodat lea unnon.
Guolásteaddjiin eanetlohku oidá stággoguolásteami. Diimmá guolástanlobiin 80 proseantta ledje stággolobit. Bivdduslobiid bivnnutvuohta lea jagis jahkái hiljážii skuotnjan.
Vánddardanguovlluid čuozáhagat geasuhit
Eanemus vuvdojuvvon guolástančuozáhagat diibmá ledje Ruunaa guoikkat Lieksas (4 400 lobi), Hossa Suomussalmis (4 300 lobi) ja Evo Niemisjávrrit Hämeenlinnas (4 100 lobi). Dáin Ruunaa ja Niemisjávrrit leat stáhta vánddardanguovlluin.
Stáhta guovlluid bivdit ja guolásteaddjit buktet čuozáhateanangottiide sakka lassiboađuid. Diibmá sii háhke bálvalusaid 51, 8 miljovnna euro ovddas. Bivdiid ja guolásteddjiid barggaheaddji váikkuhus lei 274 olmmošbargojagi, mii čuzii eanemusat Nuorta- ja Davvi-Supmii.
Bivdinlobit 2019–2023 *)
- 2019 71 398
- 2020 85 188
- 2021 85 391
- 2022 85 369
- 2023 84 268
Guolástanlobit 2019–2023 *)
- 2019 94 121
- 2020 117 233
- 2021 107 585
- 2022 94 032
- 2023 101 258
Gáldu: Meahciráđđehusa Meahccebálvalusat
*) lobit leat ilmmuhuvvon bihttámearrin, eai lohpejándorin.