Lappi buresveadjinguovllu, Lappi gádjunlágádusa ja Meahciráđđehusa oktasašdieđáhus

Lappi gádjunlágádus lea maŋimuš viđa beaivvi siste viežžan meahcis eret olbmuid, geain lea čoavjedávda. Olbmot leat vižžojuvvon Salonlampi lávus, Rávdoláddo beaivestobus ja Luirojávrri barttas. Olbmuid, geat johtet Urho Kekkonen álbmotmeahci guovllus čuovvovaš vahku áigge, rávvejit garvit epidemiijaguovllu hivssegiid, stobuid ja eará bosihanbáikkiid.

Urho Kekkonen álbmotmeahcis leat gávnnahuvvon 29.2. maŋŋá čoavjedávdaepidemiija Salonlampi lávu, Rávdoláddo beaivestobu ja Luirojávrri bartta guovllus.

Olbmuid, geat johtet Urho Kekkonen álbmotmeahcis, rávvejit čuovvovaš vahku áigge garvit epidemiijaguovllus bosihanbáikkiid, hivssegiid ja lávuid. Ná estojuvvo, ahte dávda ii njoamo diŋggaid bajážiin.

Dán muttus ii leat dieđus, mii dagaha dávdda. Dávdda govvádusa mielde dat sáhttá leat dávda, mii lea boahtán virusis. Čoavjedávddaid sáhttá eastadit dainna, ahte bassá gieđaid bures sáibbuin. Vaikko livčče dušše láivves dávdamearkkat, pasieanttat galggašedje álo buohcat dávdda iežaset orrunsajis. Ná estojuvvojit lassenjoammumat.

- Dávjjimusat epidemiija nohká vahkus. Mis eai leat čájánasat buohccán olbmuin, nappo dál ii leat dárkilis diehtu das, leago dát norovirus vai mii nu eará dávddaid, Markku Broas Lappi buresveadjinguovllus dadjá.

Njukčamánnu lea čuoiganáigi erenomážit Suoločielggis ja Kilooaivvis, gos vulget máŋggat bivnnuhis geinnodagat Urho Kekkonen álbmotmeahccái. Buohkaid, geat johtet Urho Kekkonen álbmotmeahci guovllus, ávžžuhit fuolahit buori giehtahygieniijas.

- Giđđacugŋo áigge máŋggat vánddardeaddjit sáhttet johtit oalle guhkes mátkkiid. Buori giehtagyhieniijas gánnáha fuolahit áibbas buot báikkiin, vaikko jođášiige eanet boaittobealde. Mii eat jáhke, ahte oktage háliida buohccát čoavjedávdii guovdu meahci, virkkosmahttingeavahusa áššedovdi Kristiina Aikio Meahciráđđehusa Luonddubálvalusain dadjá. Luonddubálvalusat vástidit álbmotmehciid dikšumis.

Lappi buresveadjinguovllu infekšuvnnaid eastadanovttadagat rávvejit sierra dearvvašvuođafuolahusa buohccán olbmuid čájánasaid váldimis.

Gádjunlágádus lea fievrredan máŋggaid olbmuid eret álbmotmeahcis

Dávdaalbmanusat bohte ovdan, go Lappi gádjunlágádus áiccai guovllus seammasullasaš gádjunbargguid. Guovllus gáddjojuvvojedje olmmošjoavkkut, main ledje čoavjedávdamearkkat. Čieža olbmo evakuerejuvvojedje mohtorgielkkáin duorastaga 29.2. Salonlampi lávus ja sotnabeaivve 3.3. njeallje olbmo Rávdoláddo beaivestobus. Maŋimuš guovtti olbmo boavji evakuerejuvvui Luirojávrri barttas veaigin 5.3. Oktiibuot leat evakueren 13 olbmo.

- Evakueremat leat eanet go dábálaččat ja mii leat gártan viežžat buohccán olbmuid eret maiddái helikopteriin, gohcci buollinmeašttir Timo Nyholm Lappi gádjunlágádusas muitala.

Lassidieđut

• Urho Kekkonen álbmotmeahcci