Ođđasat
Huutokaupat.comii leat boahtán vuovdimassii odne gávcci Meahciráđđehusa stobu Lappis mat leat fuones ortnegis. Mihttomearrin lea geahpedit Meahciráđđehusa Luonddubálvalusaid oamastan ráhkadusaid meari ja čuohppat goluid.
Vuovdimasas leat gávcci stobu: vihtta Meahciráđđehusa meahccebearráigeahču ja luonddusuodjaleami geavahan bearráigeahččostobu ja vánddardeaddjiid geavahusas leamašan Saarijärvi boares ávdin- ja láigostohpu Giehtaruohttasis, Uurrekarkia ávdinstohpun doaibman buollingoziheaddji stohpu ja Buljju buollingoziheaddji stohpu. Vánddardeaddjiid geavahusas leamašan ávdinstobut eai leat leamašan soames áigái geavahusas fuones ortnega dihtii.
Vuolggahaddi buot čuozáhagain lea nolla euro. Čuozáhagat vuvdojuvvojit, jus boahtá oktage fálaldat. Ráhkadusa ferte burgit ja viežžat eret.
– Ráhkadusat leat eanaš oassái fuones ortnegis, ovdamearkka dihtii oasis ráhkadusain gávdno guohpa. Oasti ferte burgit čuozáhaga, doalvut dan eret ja čorget báikki. Ovdamearkka dihtii Kemiöjärvi láigostobu sávdni vuvdojuvvui mannan jagi seammá láhkai burgimii. Vaikko čuozáhat lei fuones ortnegis, oasti gávdnui ja son sáhtii atnit ávkin sávnni hirssaid nuppi huksenfidnus, muitala gieddeoaivámuš Henri Arponen Meahciráđđehusa Luonddubálvalusain.
Jos oasti ii gávdno, Meahciráđđehus burgá ráhkadusaid ieš.
Luonddubálvalusat geahpeda ráhkadusaidis meari olles riikkas
Meahciráđđehusa Luonddubálvalusaid hálddus leat dán muttus olleš riikkas sullii 2 400 ráhkadusa. Leat aiddo árvvoštallamin buot ráhkadusaid ortnega, bajásdoallangoluid ja geavaheami.
– Oasis ráhkadusain, mat bohtet vuovdimassii, ii leat šat atnu dahje golut leat šaddan menddo stuorisin. Luohpamin oasis ráhkadusain mii sáhttit dásset ráhkadusaide čuohcán ovddasvástádussamet ja resurssaid mat min geavahusas leat, muitala luonddubálvalushoavda Henrik Jansson Meahciráđđehusas.
Vuovdimassii leat maŋŋeleappos boahtimin maiddái lasi čuozáhagat olles riikkas. Luonddubálvalusat doaibmá stáhta bušeahttaruhtademiin birasministeriija sihke eana- ja meahccedoalloministeriija stivrema vuolde.
– Ráhkadusaid vuovdin lea okta dahku min golmma miljovnna euro seastinprográmmas, man mihttomearrin lea čuohppat goluid, Jansson dadjá.
Meahciráđđehusa stobut Lappis mat lea vuovdimasas
- Kivijärvi bearráigeahččanstohpu (huutokaupat.com)
- Naskama bearráigeahččanstohpu (huutokaupat.com)
- Bahásjoga bearráigeahččanstohpu (huutokaupat.com)
- Pitsloma stohpu ja sávdni (huutokaupat.com)
- Buljju buollingoziheaddji stohpu (huutokaupat.com)
- Suolojávrri ávdinstohpu (huutokaupat.com)
- Soahtejoga bearráigeahččanstohpu (huutokaupat.com)
- Uurrekarkia buollingoziheaddji stohpu, ávdinstohpu (huutokaupat.com)
Fáttá birra árabut:
- Meahciráđđehusa dieđáhus 15.6. Meahciráđđehus árvvoštallá ráhkadusaidis ortnega, anolašvuođa ja bajásdoallangoluid (suomagillii)
- Meahciráđđehusa dieđáhus 4.12. Meahciráđđehusa nuppástusráđđádallamat nohket – 43 olbmo barggut nohket, bálvalanfierpmádaga dárkkástallat maŋŋeleappos (metsa.fi, suomagillii)