Mo Bievrrašjávrri meahcceguovlu ávkkástallo ja dikšojuvvo čuovvovaš jahkelogi áigge – Meahciráđđehus álggaha plánema
Eanodagas lean Bievrrašjávrri meahcceguovllu dikšun- ja geavahanplána mihttomearri lea heivehit oktii luonddusuodjaleami, vánddardeami, sámekultuvrra sihke boazodoalu ja eará ealáhusaid. Meahciráđđehus dahká plána guovllu geavaheaddjiid ja čanusjoavkkuid gullamiin.
Gárvvisteami vuollásaš dikšun- ja geavahanplána meroštallá eandalii Meahciráđđehusa doaimma guovllus čuovvovaš 10-15 jagi. Rámmaid Bievrrašjávrri meahcceguovllu dikšuma ja geavaheami plánemii addá meahcceguovlluláhka, man mielde Bievrrašjávri, dego buot Lappi 12 meahcceguovllu leat vuođđuduvvon meahcceluonddu seailluheapmin, sámekultuvrra ja luondduealáhusaid dorvvasteapmin sihke luonddu máŋggabealat ávkkástallama ja dan eavttuid ovddideapmin.
Plánenbargu dahkko ovttas viiddis ovttasbarggus ja dan jođiha Meahciráđđehusa Luonddubálvalusat.
– Vuođđudat plánema doarjjan ovttasbargojoavkku, masa bovdet mielde guovllu earálágan čanusjoavkkuid ja ávkkástalliid. Go meahcceguovlu lea ollásit sámiid ruovttuguovllus, leat anus viiddis oassálastima lassin Meahciráđđehusa ja sámedikki ovttas sohppojuvvon Akwé:Kon-doaibmamálle, muitala eanageavaheami sierraáššedovdi Pirjo Rautiainen Meahciráđđehusa Luonddubálvalusain.
Muital oaivilat Bievrrašjávrri dikšumis ja ávkkástallamis
Olles plánaproseassa áigge buot riikkavuložiin ja čanusjoavkkuin lea vejolašvuohta muitalit oaivileaset ja sávaldagaset meahcceguovllu ektui.
Plánema ovdáneami sáhttá čuovvut neahttasiidduin čujuhusas www.metsa.fi.
Ođđa dikšun ja geavahanplána lea oaivvilduvvon gárvánit jagi 2024.
Bievrrašjávri lea čázádagaid, buolžžaid, sáttobáruid meahcceguovlu
Bievrrašjávri lea sáttobáruid, buolžžaid ja čázádagaid meahcceguovlu. Meahcceguovllus leat maiddái fuopmášahtti kulturárbečuozáhagat, ovdamearkan riikkaviidosaččat fuopmášuhtti Gálggojávrri ja Bievrrašjávrri siiddaid kulturbirrasat, ja guovllus leat gávdnan maiddái valjit ovdahistorjjálaš dološbázahasaid.
Bievrrašjávrri meahcceguvlui eai leat merkejuvvon vánddardanjohtolagat, muhto doppe leat valjit boares merkekeahtes johtolagat, go guovlu lea dehálaš guollebivdo-, meahccebivdo- ja boazodoalloguovlu. Maŋimuš jagiid Bievrrašjávrri meahcceguovllu mearkkašupmi maiddái vánddardančuozáhahkan lea lassánan, eandalii sihkkelastima bivnnuhisvuođa lassáneami mielde.