Meahciráđđehusa Luonddubálvalusat molsu Ylläsduoddara bivnnuhis vánddardanjohtolaga rovvemuoraid, mat leat fuones ortnegis, stálleráiggaspláhtaide. Mihttomearrin lea eastit šaddošlájaid beales máŋggabealat Varkaankuru luonddu gollama vánddardanjohtolaga guoras ja buoridit vánddardeaddjiid dorvvolašvuođa.
Árat Varkaankuru rovvemuorat leat huksejuvvon jagis 2013. Bállás-Ylläsduottar lea Suoma bivnnuhamos álbmotmeahcci, galledeaddjimearit leat lassánan logi jagis.
– Vázzit leat sirdašuvvan eret gáržžes rovvemuorain, go ovddal leat boahtán earát vánddardeaddjit. Seammás ádjaga ravddaid hearkkes šattolašvuohta lea gollan, gieddeoaivámuš Inari Ylläsjärvi muitala, manin gáržžes rovvemuorat molsojuvvojit dál.
Stálleráhkadusat álbmotmeahcis boktet dovdduid, dasgo buohkaid mielas stálli ii heive álbmotmeahccái. Meahciráđđehus vihkkedallá dárkilit vánddardanjohtolagaid materiálaválljemiid álbmotmehciin. Mihttomearrin lea dahkat guhkesáigásaš válljejumiid. Stálleráhkadusat leat mannan jagiid molsojuvvon ovdamearkka dihtii Pyhä-Luosto álbmotmeahccái Isokuru johtolahkii.
– Go veardidit murrii, de stálli geavahanahki luonddus lea hui guhkki. Min árvvoštallama mielde muoras ráhkaduvvon johtolaga galggašii ođasmahttit goittotge golmma háve ovdal go stálleráhkadusa gártá ođasmahttit dahje divvut viidáseappot, Ylläsjärvi muitala.
Maiddái juohkehaš johtolaga divvun- ja huksenhávvi noađuha luonddu ja golaha eatnama. Varkaankuru lea stuorra oassái rohtu, gos gávdnojit máŋggabealagiid áittavulošge šattut, ovdamearkka dihtii suotnašattut, sámmálat ja čátnát.
– Stálli lea materiála man sáhttá ávkkástallat ođđasit. Juohke sadjái eat dan bija, muhto earenoamážit hástaleaddji diliin stálli doaibmá bures. Rovvemuorat leat arvin njaláhasat, stálleráiggaspláhtat eai. Johtolat lea maiddái dorvvolaččat, go dain ii dárbbaš spiehkkasit. Seammás mii eastit suodjaluvvon luonddu gollama, Ylläsjärvi joatká.
Stálleráiggaspláhtaid siidduide leat boahtimin vánddardeaddjiid beatnagiidda pláŋkkut. Beatnagiid geahpilat eai álo geardda stálleráiggaspláhtaid, pláŋkkuin háliidat veahkehit maiddái njealjejuolggat skihpáriid lihkadeami.
Huksenbarggut joatkašuvvet geasi – Varkaankurus ii oaččo lihkadit virggálaš johtolagaid olggobealde
Geasi áigge Ylläsduoddara luondduguovddáš Kellokkaas Varkaankuru goahtái dolvon johtolat lea gitta. Huksenbarggut leat bárrásiin jođus. Geavatlaš barggu meahcis bargá agoartaváldi Arto Pääkkö, Pohjolan Luontopalvelut Oy.
Meahciráđđehus muittuha, ahte Varkaankuru lea ráddjehusavádat, gos lihkadeapmi merkejuvvon johtolagaid olggobealde lea gildojuvvon 1.5.–30.11. Ođasmahtton johtolahkii leat boahtimin maŋŋeleappos čakčat maiddái šilttat, mat muitalit, ahte bálgás spiehkkaseapmi lea gildojuvvon. Ráddjehusain mii háliidit suodjalit guovllu hearkkes ja suodjaluvvon luonddu gollamis.
Johtolaga Kellokkaas Kesänkijärvii sáhttá fas johtit geasi áigge. Maiddái Varkaanlampi oainnusbáikái beassá johtolaga mielde mat leat geavahusas.