Lappi álbmotmehciid vásttolašvuođa- ja suvdilisvuođabargu nanosmuvvá: Urho Kekkonen ja Pyhä–Luosto álbmotmeahcit ožžo Visit Finlanda suvdilis turismma mearkkaid
Urho Kekkonen ja Pyhä–Luosto álbmotmeahcit leat ožžon Visit Finlanda mieđihan suvdilis turismma Sustainable Travel Finland (STF) -mearkkaid. Guktuin álbmotmehciin leat bargan gillilis barggu ekologalaš suvdilisvuođa ja turismma vásttolašvuođa ovddideapmin. Mearka maiddái ovddida bistevaš buorideapmi, ja guktuide álbmotmehciide leat gárvvistuvvon jo plánat.
“Álbmotmeahcit leat Suoma luonddu čájáhuslásat riikkaidgaskasaš ja ruovttueatnama turismamárkaniidda. Danin daid oasis ferte earenoamážit vuhtiiváldit suvdilisvuođa- ja vásttolašvuođaáššiid. Lappis árktalaš, hearkkes luonddu ja mávssolaš kulturárbbi ferte vuhtiiváldit. Dat lea seammás maiddái turistta, báikkálašálbmoga ja guovllu fitnodatdolliid eaktu, dasgo geasuheaddji dahkkiid ii oaččo massit”, dadjá turismma sierraáššedovdi Marja Männistö, gii doaibmá Davvi-Sámis STF-vástideaddjin.
“Vásttolašvuođabargu lea bistevaš ja háliidit bargat dáinna ovttas turismasurggiin ja báikkálaš doaibmiiguin”, deattuha turismma sierraáššedovdi Katja Blomberg Pyhä–Luosto álbmotmeahcis.
Guktuin álbmotmehciin leat investeren ekologalaš suvdilisvuhtii
STF-árvvoštallama vuođul Urho Kekkonen álbmotmeahcis ekologalaš suvdilisvuohta lea dikšojuvvon bures. Ferte suokkardallat vel báikkálašvuođa deattuheami, dasgo ovdamearkka dihtii skáhpponlága mielde skáhppomiid ferte gilvalahttit riikkaidgaskasaččat ja juoba EU-dásis. Lassin ferte suokkardallat, mo bivnnuhis mássadáhpáhusaid lassáneami bisuhit suvdilisvuođa rájáin.
Pyhä–Luosto álbmotmeahcis STF-árvvoštallama mielde suvdilisvuohta lea buot doaibmama guovddážis. Dat oidno konkrehtalaččat mannan jagiid vánddardanbálvalusaid ja -geinnodagaid ovddideamis. Álbmotmeahci vánddardaninfra ovddidanollislašvuođa mihttomearrin lea leamašan buoridit earenoamážit ođđa ja hárjánmeahttun luonddus lihkadeaddjiid vejolašvuođaid beassat dorvvolaččat návddašit Pyhä–Luosto álbmotmeahci luonddus. Áššehasgulahallamii lea investerejuvvon nu digitála čovdosiin go ođđa dihkádemiin. Mihttomearrin lea, ahte galledeaddjit atnet árvvus ja áddejit birastahtti luonddu ain eanet.
Mii Sustainable Travel Finland (STF)?
Sustainable Travel Finland lea ng. arvesuodjemearka, man vulobealde leat Suoma vásttolaš doaibmit. Mearkka ožžon doaibmi lea suvdilis turismma ovdanvázzi ja figgá buot doaimmainis geahpedit doaimma vahátlaš váikkuhusaid nu globála go báikkálaš dásis. Mearka mieđihuvvo mearreáigái ja dat gáibida doaibmama bistevaš ovddideami ekologalaččat, ekonomalaččat ja sosiálalaččat suvdilut ja vásttolut turismma guvlui.
Suomas leat 41 álbmotmeahci ja máŋggat earát luonddusuodjalanguovllut. Álgomuttus sullii bealli álbmotmehciin čađaha STF-prográmma. Meahciráđđehusas leat geavahusas maiddái earát suvdilisvuođa prográmmat ja mihttárat, dasgo suvdilisvuođabargu lea bistán systemáhtalaččat jo guhká.